തിരുവനന്തപുരം: എസ് ഡി പി ഐ പ്രവർത്തകർക്ക് പൊലീസിൽ നിന്നും രഹസ്യ വിവരങ്ങൾ ചോർത്തി നൽകിയ പൊലീസുകാരൻ അനസിനെ പിരിച്ചു വിട്ടു. ഇടുക്കി കരിമണ്ണൂര്‍ സ്റ്റേഷനിലെ സിവിൽ പൊലീസ് ഓഫീസർ ആയിരുന്നു പി കെ അനസ്. പൊലീസ് ഡേറ്റാബേസിൽ നിന്നു വിവരങ്ങൾ ചോർത്തി നൽകിയെന്നതായിരുന്നു അനസിനെതിരായ കുറ്റം.
കേസിൽ അനസിന് കാരണം കാണിക്കൽ നോട്ടീസ് നൽകിയിരുന്നു. എന്നാൽ അനസിന്റെ മറുപടി തൃപ്തികരമല്ലാത്തതിനെ തുടർന്ന് പിരിച്ചു വിടാൻ തീരുമാനിക്കുകയായിരുന്നു. 13 വർഷമായി സർവീസുള്ള അനസ്, കാഞ്ഞാർ പൊലീസ് സ്റ്റേഷനിലുള്ളപ്പോഴായിരുന്നു വിവരങ്ങൾ ചോർത്തിയത്.
വണ്ണപ്പുറം സ്വദേശിക്കാണ് ആർഎസ്എസ്, ബിജെപി നേതാക്കളുടെ വ്യക്തി വിവരങ്ങൾ അനസ് കൈമാറിയത്. പൊലീസ് ഡേറ്റബേസിൽ നിന്ന് സ്വകാര്യ ഇ മെയിൽ വഴി തന്റെ ഫോണിലേക്കു വിവരങ്ങൾ എടുക്കുകയും തുടർന്ന് എസ്ഡിപിഐ പ്രവർത്തകർക്ക് കൈമാറുകയുമായിരുന്നു. സംഭവം പുറത്തായതോടെ അനസിനെ സസ്പെൻഡ് ചെയ്തിരുന്നു.
