കാസർകോട്: പതിനഞ്ച് ലക്ഷം രൂപയുടെ കന്നുകാലിക്കുടൽ കടത്തിയ കേസിൽ പശ്ചിമ ബംഗാൾ സ്വദേശികളായ സെയ്ദുൽ, റബിയുൾ എന്നിവർ അറസ്റ്റിൽ. കന്നുകാലികളുടെ കുടല് ഉണക്കി ഉപ്പിലിട്ട് കയറ്റുമതി ചെയ്യുന്ന സ്ഥാപനത്തില്നിന്നും ചരക്ക് മോഷ്ടിച്ച് കടത്തിയതിനാണ് ഇവർ അറസ്റ്റിലായത്. ഇരുവരെയും കാസർകോട് പൊലീസ് തമിഴ്നാട്ടിലെ വാണിയമ്പാടിയില്നിന്നാണ് പിടികൂടിയത്.
പിടിയിലായവരിൽ നിന്നും രണ്ടരലക്ഷം രൂപയുടെ മോഷണമുതലും അമ്പതിനായിരം രൂപയും കണ്ടെടുത്തു. ഏപ്രില് 18-നാണ് കാസര്കോട്ടെ സ്ഥാപനത്തില് നിന്നും 15 ലക്ഷത്തിന്റെ കന്നുകാലിക്കുടലുകള് മോഷണംപോയത്. സ്ഥാപനത്തിലെ തൊഴിലാളികളായ ആറ് അസം സ്വദേശികളെയും അന്നേദിവസം മുതല് കാണാതായിരുന്നു.
സ്ഥാപനത്തില് ഉപയോഗിച്ചിരുന്ന മൂന്ന് ബൈക്കുകളും കാണാതായിരുന്നു. തുടര്ന്ന് ഉടമകള് നല്കിയ പരാതിയിലാണ് കാസര്കോട് ടൗണ് പോലീസ് കേസെടുത്ത് അന്വേഷണം ആരംഭിച്ചത്. തുടർന്ന് ബൈക്കുകൾ കണ്ടെത്തിയിരുന്നു.
കാസര്കോട് റെയില്വേ സ്റ്റേഷന് പരിസരത്തുനിന്നാണ് ബൈക്കുകള് കണ്ടെത്തിയത്. തുടർന്ന് നടത്തിയ അന്വേഷണത്തിൽ തൊഴിലാളികളില് ഒരാളുടെ മൊബൈല്ഫോണ് വിളികളുടെ വിവരങ്ങള് പോലീസിന് ലഭിച്ചു. തമിഴ്നാട് ദിണ്ടിക്കലിലുള്ള സെയ്ദുല് എന്നയാളുമായി ഇയാള് നിരന്തരം ഫോണില് ബന്ധപ്പെട്ടിരുന്നതായി ഈ വിവരങ്ങളില്നിന്ന് പൊലീസിന് മനസ്സിലായി.
ദിണ്ടിക്കലില് കന്നുകാലിക്കുടലുകള് കയറ്റി അയക്കുന്ന വ്യാപാരം ചെയ്യുന്നയാളാണ് സെയ്ദുലെന്ന് പൊലീസ് കണ്ടെത്തി. ഇതോടെ പോലീസ് സംഘം സെയ്ദുലിനെ തിരഞ്ഞ് ദിണ്ടിക്കലില് എത്തിയെങ്കിലും ഇയാള് ഇവിടെനിന്നും മുങ്ങിയിരുന്നു. തുടര്ന്ന് നടത്തിയ അന്വേഷണത്തിലാണ് ഇയാളെയും കൂട്ടാളിയായ റബിയുലിനെയും വാണിയമ്പാടിയിൽ നിന്നും കസ്റ്റഡിയിൽ എടുത്തത്.
കാസര്കോട്ട് നിന്ന് മോഷ്ടിച്ച ചരക്കില് ഭൂരിഭാഗവും മറിച്ചുവിറ്റ് അഞ്ചരലക്ഷത്തോളം രൂപ എല്ലാവരും വീതിച്ചെടുത്തതായി പൊലീസ് പറഞ്ഞു. സംഭവത്തില് പ്രതികളായ അസം സ്വദേശികള് ബംഗാളിലേക്ക് കടന്നതായാണ് സൂചന. ഇവർക്കായി പൊലീസ് അന്വേഷണം ഊർജ്ജിതമാക്കി.
