തിരുവനന്തപുരം: സംസ്ഥാനത്ത് നായക്കളെ കൊല്ലുന്നവര്‍ക്കെതിരെ നിയമപരമായ നടപടിയെടുക്കുമെന്ന് ഡി.ജി. പി ടി.പി സെന്‍കുമാര്‍ പറഞ്ഞു. അക്രമകാരികളായ തെരുവുനായക്കളെ കൊല്ലാന്‍ മാത്രമാണ് കോടതികള്‍ അനുവാദം നല്‍കിയിരിക്കുന്നത്. അതിന്റെ പേരില്‍ തെരുവുനായക്കളെ കൊല്ലാന്‍ ആകില്ലെന്ന് ഡി.ജി.പി പറഞ്ഞു.
സര്‍വകക്ഷിയോഗത്തില്‍ എടുത്ത തീരുമാനങ്ങള്‍ നിയമമല്ല. പോലീസിന് ഭരണഘടനയും നിയമവും അനുസരിച്ച് മാത്രമാണ് പ്രവര്‍ത്തിക്കാനാകുക- അദ്ദേഹം വാര്‍ത്താ സമ്മേളനത്തില്‍ പറഞ്ഞു.
അക്രമകാരികളായ നായക്കളെ കൊല്ലേണ്ടത് ആവശ്യമാണെന്ന ഹൈക്കോടതി വിധി മറികടന്ന് തെരുവുനായക്കളെ കൊല്ലുന്നവര്‍ക്കെതിരെ കേസെടുക്കണമെന്ന സര്‍ക്കുലര്‍ ഡി.ജി.പി ഇറക്കിയത് എങ്ങിനെയെന്ന് മനുഷ്യാവകാശ കമ്മീഷന്‍ വിശദീകരണം ചോദിച്ചിരുന്നു.
അതേ സമയം നായശല്യം നിയന്ത്രിക്കണമെന്നാവശ്യപ്പെട്ട് തെരുവുനായ്ക്കളുമായി കൊച്ചൗസേപ്പ് ചിറ്റിലപ്പള്ളി, ജോസ് മാവേലി എന്നിവരുടെ നേതൃത്വത്തില്‍ പള്ളുരുത്തി പോലീസ് സ്‌റ്റേഷനുമുന്നില്‍ പ്രതിഷേധസമരം നടത്തുകയാണ്. തെരുവില്‍ നിന്നും പിടികൂടിയ നാല് നായ്ക്കളെയും ഇവര്‍ മിനിലോറിയില്‍ കയറ്റി പോസ്റ്റ് സ്‌റ്റേഷനുമുന്നിലെത്തിയിരുന്നു.
നായ്ക്കളുമായി പ്രതിഷേധിച്ചവര്‍ക്കെതിരെ പോലീസ് കേസെടുത്തിട്ടുണ്ട്.
Discussion about this post