ബെഹ്‌റാംപൂർ: ആറ് വയസുളള കുട്ടിയെ ഇടിച്ചിട്ട് വലിച്ചിഴച്ച് തൃണമൂൽ എംപിയുടെ വാഹനം. മുർഷിദാബാദ് എംപി അബു താഹെർ ഖാന്റെ എസ് യുവിയാണ് കുട്ടിയെ ഇടിച്ചിട്ട് മീറ്ററുകളോളം വലിച്ചുകൊണ്ടുപോയത്. മുർഷിദാബാദിലെ നൗഡയിൽ ബുധനാഴ്ചയായിരുന്നു സംഭവം.
എംപിയുടെ വാഹനത്തിൽ തന്നെ കുട്ടിയെ മുർഷിദാബാദ് മെഡിക്കൽ കോളജിൽ പ്രവേശിപ്പിച്ചുവെങ്കിലും പരിക്ക് ഗുരുതരമായതിനാൽ ജീവൻ രക്ഷിക്കാനായില്ല. ഉച്ചയ്ക്ക് 2 മണിക്കും 2.30 ക്കും ഉളളിലാണ് അപകടം ഉണ്ടായതെന്ന് മുർഷിദാബാദ് പോലീസ് സൂപ്രണ്ട് കെ ശബരി രാജ്കുമാർ പറഞ്ഞു.
സംഭവത്തിൽ പോലീസ് എഫ്‌ഐആർ രജിസ്റ്റർ ചെയ്തിട്ടുണ്ട്. എസ് യുവി പിടിച്ചെടുത്ത് വാഹനം ഓടിച്ചിരുന്ന ആളെ അറസ്റ്റ് ചെയ്തതായും പോലീസ് പറഞ്ഞു.
അമ്മയുടെ കണ്ണ് വെട്ടിച്ച് കുട്ടിറോഡിലേക്ക് ഇറങ്ങുകയായിരുന്നുവെന്നും അതിനിടയിലാണ് അപകടത്തിൽപെട്ടതെന്നും തൃണമൂൽ നേതാവിനെ ഉദ്ധരിച്ച് വാർത്താ ഏജൻസിയായ എഎൻഐ റിപ്പോർട്ട് ചെയ്തു.
