തിരുവനന്തപുരം: സംസ്ഥാന സ്കൂൾ കായികമേള നടക്കുന്ന തിരുവനന്തപുരം യൂണിവേഴ്സിറ്റി സ്റ്റേഡിയത്തിൽ മരച്ചില്ല ഒടിഞ്ഞ് വീണ് അപകടം. രണ്ട് കുട്ടികൾക്കും പരിശീലകനും അപകടത്തിൽ പരിക്കേറ്റു.കുട്ടികൾ ഇരുന്ന ഗ്യാലറിയിലേക്കാണ് മരച്ചില്ല ഒടിഞ്ഞ് വീണത്. കളി കണ്ടു കൊണ്ട് നിന്നവർ ഓടി മാറിയതിനാൽ വലിയ അപകടം ഒഴിവായി.
മത്സരങ്ങൾ ആരംഭിക്കാനിരിക്കെയാണ് അപകടം നടന്നത്. പരിക്കുപറ്റിയവരെ തിരുവനന്തപുരം ജനറൽ ആശുപത്രിയിലേക്ക് മാറ്റി. വിദ്യാഭ്യാസമന്ത്രി വി.ശിവൻ കുട്ടി അപകടസ്ഥലം സന്ദർശിച്ചു. സ്ഥലത്ത് നിന്ന് ആളുകളെ ഒഴിപ്പിച്ചിട്ടുണ്ട്. മത്സരങ്ങൾ തടസ്സപ്പെട്ടിട്ടില്ല. പരിക്ക് സാരമുള്ളതല്ലെന്നാണ് സൂചന.
ഫയർഫോഴ്സ് എത്തി മരച്ചില്ലകൾ മുറിച്ചുമാറ്റുന്നുണ്ട്. സംസ്ഥാന കായിക മേള നടക്കുന്ന സ്റ്റേഡിയത്തിലെ സുരക്ഷ ക്രമീകരണങ്ങളുടെ അപര്യാപ്തത വിമർശനം വിളിച്ചു വരുത്തുന്നുണ്ട്. അപകടകരമായ രീതിയിൽ നിൽക്കുന്ന മരങ്ങളുടെ കാര്യത്തിൽ പ്രത്യേക ശ്രദ്ധ പുലർത്തിയില്ല എന്നും ആക്ഷേപം ഉയരുന്നുണ്ട്.
Discussion about this post