ബോളിവുഡില്‍ നടിമാരോടുള്ള സമീപനത്തെ കുറിച്ച് തുറന്നടിച്ച് പ്രിയങ്ക ചോപ്ര. സിനിമയിലെത്തുന്ന നടിമാര്‍ക്ക് ആദ്യകാലങ്ങളില്‍ വേതനം വളരെ തുച്ഛമാണെന്ന് ഒരു പ്രമുഖ മാധ്യമത്തിന് നല്‍കിയ അഭിമുഖത്തില്‍ താരം വ്യക്തമാക്കി.
ബോളിവുഡ് ചിത്രങ്ങളില്‍ അഭിനയിച്ച് തുടങ്ങുന്ന കാലത്ത് നായക നടന് ലഭിക്കുന്ന വേതനത്തിന്റെ വെറും പത്ത് ശതമാനം മാത്രമാണ് തനിക്ക് ലഭിച്ചിരുന്നതെന്നും തുല്യത എന്നൊന്ന് ബോളിവുഡില്‍ ആദ്യകാലത്തൊന്നും അനുഭവിച്ചിരുന്നില്ലെന്നും നടി തുറന്നടിച്ചു. ഇത് മാത്രമല്ല സിനിമകളുടെ സെറ്റില്‍ പോലും പുരുഷ അഭിനേതാക്കള്‍ക്ക് പ്രത്യേക പരിഗണന ലഭിച്ചിരുന്നതായും നടി ചൂണ്ടിക്കാട്ടി. ” വേതന വ്യവസ്ഥയിലുള്ള വിടവ് വളരെ വലുതാണ്. ഇപ്പോഴും ഒട്ടുമിക്ക നടിമാരും ഈ അവസ്ഥ നേരിടുന്നുണ്ട്. എന്റെ തലമുറയിലെ നടിമാര്‍ തുല്യവേതനം അവശ്യപ്പെട്ടിട്ടുണ്ട്. ഞങ്ങള്‍ ചോദിച്ചു, പക്ഷേ കിട്ടിയിട്ടില്ല”, പ്രിയങ്ക പറഞ്ഞു. നിലവില്‍ ഹോളിവുഡില്‍ സജീവമായ പ്രിയങ്ക അവിടെ കാര്യങ്ങള്‍ കുറച്ചുകൂടി വ്യത്യസ്തമാണെന്നും ചൂണ്ടിക്കാട്ടുകയുണ്ടായി. അടുത്തിടെ ബിബിസിയുടെ ഏറ്റവും സ്വാധീനമുള്ള 100 വനിതകളുടെ പട്ടികയിലും നടി സ്ഥാനമുറപ്പിച്ചിരുന്നു.
പ്രിയങ്ക പ്രധാന വേഷത്തിലെത്തുന്ന സിറ്റാഡല്‍ പ്രൈം വീഡിയോയില്‍ അടുത്തു തന്നെ റിലീസ് ചെയ്യാനിരിക്കുകയാണ്. സയന്‍സ് ഫിക്ഷന്‍ ഡ്രാമ വിഭാഗത്തിലുള്ള സിറ്റാഡലിലെ നടിയുടെ കഥാപാത്രം ഇതിനോടകം തന്നെ ശ്രദ്ധ നേടിക്കഴിഞ്ഞു. 2023 ല്‍ റിലീസ് ചെയ്യാനിരിക്കുന്ന ജീ ലേ സെരായാണ് പ്രിയങ്കയുടെ അടുത്ത ബോളിവുഡ് ചിത്രം. ഫറാന്‍ അക്തറിന്റെ ഈ ചിത്രത്തില്‍ ആലിയ ഭട്ട്, കത്രീന കെയ്ഫ് തുടങ്ങിയ വന്‍ താരനിരയാണുള്ളത്.
Discussion about this post