തിരുവനന്തപുരം: പാടത്തിന് നടുവില് മഴയത്ത് കുടയും ചൂടി സങ്കടത്തോടെ നില്ക്കുന്ന ബാറ്റ്മാന്, അലക്കാന് വയ്യാതെ നെടുവീര്പ്പിടുന്ന വണ്ടര് വുമണ്, അയേണ് മാനാണെങ്കില് ബോറടിച്ച് പുഴ വക്കത്ത് ചൂണ്ടയിടുന്നു, അവസാന ബസിലും കാമുകിയായ ബ്ലാക്ക് വിഡോയെ കാണാത്തതിന്റെ സങ്കടത്തില് ചായക്കടയില് കരച്ചിലിന്റെ വക്കത്താണ് സൂപ്പര്മാന്. സോഷ്യല്മീഡിയയില് ചിരി പടര്ത്തിയ സാഡ് സൂപ്പര്ഹീറോസ് ഇന് കേരള എന്ന വ്യത്യസ്ത ആശയം ട്വിറ്റര് ഉള്പ്പടെ സാമൂഹ്യമാധ്യമങ്ങളില് ശ്രദ്ധ നേടുകയാണ്. ട്വിറ്ററില് സജീവമായ ശശി തരൂര് അടക്കം ചിത്രങ്ങളെ അഭിനന്ദിച്ച് രംഗത്ത് എത്തിയിട്ടുണ്ട്.
എന്താണീ ആശ്ചര്യപ്പെടുത്തുന്നവര് ചെയ്യുന്നതെന്നും, ഇതിന് എന്തെങ്കിലും പശ്ചാത്തലമോ വിശദീകരണമോ ഉണ്ടായെന്നും ചോദിച്ച് കൊണ്ടാണ് ശശി തരൂര് ചിത്രങ്ങളോട് പ്രതികരിച്ചിരിക്കുന്നത്.
അരുണ് നൂറ എന്ന ഇന്സ്റ്റഗ്രാം അക്കൗണ്ടില് നിന്നുമാണ് ചിത്രങ്ങള് പോസ്റ്റ് ചെയ്തിരിക്കുന്നത്. ഓരോ ചിത്രത്തിനും വ്യക്തമായ അടിക്കുറിപ്പും അദ്ദേഹം നല്കിയിട്ടുണ്ട്. ബാറ്റ്മാന് തന്റെ വിളകള് വവ്വാലുകള് കൊണ്ടുപോകുമോ എന്ന ആധിയിലാണ്, വണ്ടര് വുമണ് തുണി അലക്കാന് കഷ്ടപ്പെടുന്നു, അയേണ് മാന് അതൊരു വിരസ ദിനം ആയിരുന്നു, അവസാന ബസിലും കാമുകിയായ ബ്ലാക്ക് വിഡോയെ കാണാത്തതിന്റെ സങ്കടത്തിലാണ് സൂപ്പര്മാന്, ഉള്ളൂരിലെ ഒരു ചായക്കടയില് കരച്ചിലിന്റെ വക്കത്താണ് സൂപ്പര്മാന്, എന്നിങ്ങനെയുള്ള അടിക്കുറിപ്പുകളാണ് ചിത്രങ്ങള്ക്ക് അരുണ് നല്കിയിരിക്കുന്നത്.
ചിത്രങ്ങള്ക്ക് സോഷ്യല് മീഡിയയില് മികച്ച പ്രതികരണമാണ് ലഭിക്കുന്നത്.ഇത് വളരെ മനോഹരമായിരിക്കുന്നുവെന്നും ട്വിറ്ററില് താന് കാണാന് ആഗ്രഹിച്ചത് ഇതൊക്കെയാണെന്നും ഭാവനയുടെ അങ്ങേയറ്റമാണ് ഇതെന്നുമെല്ലാം ചിത്രങ്ങളെ അഭിനന്ദിച്ച് കൊണ്ട് കമന്റുകള് വന്നിട്ടുണ്ട്.
