സിനിമ പ്രേമികളും ക്രിക്കറ്റ് പ്രേമികളും ചേര്ന്ന് ഇന്ന് സോഷ്യല് മീഡിയ ജന്മദിനാശംസകള് കൊണ്ട് നിറയ്ക്കുകയാണ്. തമിഴകത്തിന്റെ താരരാജാവായ തലൈവരുടെ 72-ാം പിറന്നാള് ഒരു കൂട്ടര് കൊണ്ടാടുമ്പോള് മാസ്മരിക ബാറ്റിംഗിലൂടെ ക്രിക്കറ്റില് വിസ്മയം തീര്ത്ത യുവ്രാജിന്റെ ജന്മദിനമാണ് മറ്റുചിലര് ആഘോഷമാക്കിയിരിക്കുന്നത്. ഇരുവരേയും സ്നേഹത്തോടെ ആദരവോടെ വിളിക്കുന്ന തലൈവര്, യുവി എന്നീ വിളിപ്പേരുകളിലാണ് ആരാധകരുടെ ആശംസകളേറെയും. ഇരുവരുടേയും ജന്മദിനം ഒരേ ദിവസം വന്നതിന്റെ തിക്കും തിരക്കുമാണ് സോഷ്യല് മീഡിയയിലുടനീളം.
സൂപ്പര്താരം രജനീകാന്തിന്റെ ജന്മദിനത്തോടനുബന്ധിച്ച് തമിഴ്നാട്ടിലെ തിയറ്റര് ഉടമകള് അദ്ദേഹത്തിന്റെ സൂപ്പര്ഹിറ്റ് സിനിമ ബാബ ഇന്ന് വീണ്ടും റിലീസ് ചെയ്തിരിക്കുകയാണ്. ആരാധകര് ആവേശത്തോടെ തിയറ്ററില് എത്തുന്നുമുണ്ട്. മരുമകനും സൂപ്പര് താരവുമായ ധനുഷ് അടക്കം സിനിമ മേഖലയിലെ പ്രമുഖര് സോഷ്യല് മീഡിയയില് ജന്മദിനാശംസ പങ്കുവെച്ചു. മുന് ഇന്ത്യന് ക്രിക്കറ്റ് താരം മുഹമ്മദ് കെയ്ഫിന്റെ ട്വീറ്ററിലെ കുറിപ്പ് ഏറെ ശ്രദ്ധേയമാണ്. രജനികാന്തിന്റെയും യുവ്രാജിന്റെയും ചിത്രങ്ങള് സഹിതം പങ്കുവെച്ചുകൊണ്ട് കെയ്ഫ് ഇങ്ങനെ എഴുതി- ”ഒരേ ദിവസം ജനിച്ചു എന്നതു മാത്രമല്ല ഇവര്ക്കിടയില് പൊതുവായ കാര്യം, മറിച്ച് അദ്ഭുതങ്ങള് സൃഷ്ടിക്കാന് കഴിയുമെന്ന് നമ്മുടെ മുന്നില് തെളിയിച്ചവര് കൂടിയാണ്. ദശലക്ഷക്കണക്കിന് ആളുകളെ ചിരിപ്പിക്കാന് ഇവര്ക്ക് കഴിയും, സഹോദരനോട് സ്നേഹം.. സാറിന് സല്യൂട്ട്”. മലയാള സിനിമയിലെ താരപ്രമുഖരും രജനികാന്തിന് ആശംസകള് നേര്ന്ന് സോഷ്യല് മീഡിയയില് പോസ്റ്റ് ചെയ്തിട്ടുണ്ട്.
Discussion about this post