ന്യൂഡെല്ഹി: ഗാല്വാനിലും തവാംഗിലും ഇന്ത്യന് സൈനികര് ധൈര്യം തെളിയിച്ചെന്ന് പ്രതിരോധമന്ത്രി രാജ്നാഥ് സിംഗ്. ലോക ക്ഷേമത്തിനായി പ്രവര്ത്തിക്കുന്ന സൂപ്പര് പവര് ആകുകയാണ് ലക്ഷ്യമെന്നും 95-ാമത് ഫിക്കി വാര്ഷിക സമ്മേളനം ഉദ്ഘാടനം ചെയ്ത് സംസാരിക്കവെ അദ്ദേഹം വ്യക്തമാക്കി.
ഇന്ത്യയുടേയും ചൈനയുടേയും വളരുന്ന സാമ്പത്തിക ശക്തിയെ കുറിച്ച് പരാമര്ശിച്ച പ്രതിരോധ മന്ത്രി, 1949ല് ചൈനയുടെ ജിഡിപി ഇന്ത്യയുടേതിനേക്കാള് കുറവായിരുന്നുവെന്നും 1980 വരെ ഏറ്റവും മികച്ച പത്ത് സമ്പദ്വ്യവസ്ഥകളുടെ പട്ടികയില് പോലും ഇന്ത്യ ഉണ്ടായിരുന്നില്ലെന്നും ചൂണ്ടിക്കാട്ടി. 2014ല് ലോക സമ്പദ്വ്യവസ്ഥയില് ഇന്ത്യ 9-ാം സ്ഥാനത്താണ്. ഇന്ത്യയുടെ സമ്പദ്വ്യവസ്ഥ ഇന്ന് 3.5 ട്രില്യണ് ഡോളറിനടുത്താണ്, അതായത് ലോകത്തിലെ അഞ്ചാമത്തെ ഏറ്റവും വലിയ സമ്പദ് വ്യവസ്ഥയെന്നും അദ്ദേഹം വ്യക്തമാക്കി. കഴിഞ്ഞ ഓഗസ്റ്റ് മാസത്തില് ചെങ്കോട്ടയില് വെച്ച് ഇന്ത്യന് പ്രധാനമന്ത്രി നരേന്ദ്രമോദി അഞ്ച് പ്രതിജ്ഞകള് നാം എടുക്കണമെന്ന് ഓര്മിപ്പിച്ചത് രാജ്നാഥ് സിംഗ് ചൂണ്ടിക്കാട്ടി. ഇന്ത്യ കരുത്തുറ്റ ഒരു രാജ്യമാകാന് ഈ അഞ്ച് കാര്യങ്ങള് ആവശ്യമാണ്. അവയിലൊന്നിലും നാം ആരെയും കീഴടക്കുന്ന കാര്യങ്ങളില്ലെന്നും അദ്ദേഹം പറഞ്ഞു. ഒരു രാജ്യത്തിന്റെയും ഒരിഞ്ച് ഭൂമി പോയും നമ്മള് പിടിച്ചെടുക്കില്ലെന്നും പ്രതിരോധ മന്ത്രി പറഞ്ഞു.
