കൊച്ചി: മാളികപ്പുറം സിനിമയുടെ അടുത്ത പോസ്റ്റർ പുറത്തിറക്കി നടൻ ഉണ്ണി മുകുന്ദൻ. ഫേസ്ബുക്കിലൂടെയാണ് നടൻ പോസ്റ്റർ പുറത്തിറക്കിയത്. ചിത്രത്തിന്റെ റിലീസ് തീയതി അടുത്തതോടെ എത്തിയ പുതിയ പോസ്റ്ററും ആരാധകർ ആവേശത്തോടെ ഏറ്റെടുത്തിരിക്കുകയാണ്.
കാത്തിരിക്കാനാകില്ല എന്ന കുറിപ്പോടെയാണ് ഉണ്ണി പോസ്റ്റർ പുറത്തുവിട്ടത്. എരുമേലി പേട്ട തുളളൽ പശ്ചാത്തലമാക്കിയ ഗാനരംഗത്തിലെ കലിപ്പ് ലുക്കാണ് പോസ്റ്ററിൽ. ഈ ഗാനവും കഴിഞ്ഞ ദിവസം അണിയറ പ്രവർത്തകർ പുറത്തുവിട്ടിരുന്നു.
ഉണ്ണിയുടെ പോസ്റ്ററിന് താഴെ ആവേശത്തോടെയാണ് ആരാധകരുടെ പ്രതികരണം. ഇനിയും കാത്തിരിക്കാനാകില്ല റിലീസ് തീയതി പ്രഖ്യാപിക്കൂവെന്നാണ് അധികം പേരും കുറിച്ചത്. ഇതിലൊരു കമന്റിന് ഉണ്ണി നൽകിയ മറുപടിയും വൈറലായി. ദയവായി റിലീസ് തീയതി പ്രഖ്യാപിക്കൂവെന്ന ആരാധകന്റെ കമന്റിനാണ് യൂ മീൻ തേങ്ങ ഉടയ്ക്ക് സ്വാമീ എന്ന് ഉണ്ണിയുടെ മറുപടി എത്തിയത്. അതു തന്നെയാണ് ഉദ്ദേശിച്ചതെന്ന് പറഞ്ഞ് നിരവധി പേർ ഇതിന് മറുപടിയും നൽകി.
ഉണ്ണിയുടെ അടുത്ത കരിയർ ബ്രേക്ക് ചിത്രമായിരിക്കും ഇതെന്നും ഇനിയും കാത്തിരിക്കാൻ വയ്യെന്നും ചിലർ അഭിപ്രായപ്പെടുന്നു. നട എന്ന് തുറക്കുമെന്നാണ് ചിലരുടെ കമന്റ്. മകരവിളക്കിന് മുൻപ് പ്രതീക്ഷിക്കുന്നുവെന്നും മാളികപ്പുറത്തമ്മ അനുഗ്രഹിക്കട്ടെയെന്നും ആശംസിച്ചവരും ഉണ്ട്. കട്ട വെയ്റ്റിങ് എന്നും നിരവധി പേർ പോസ്റ്ററിന്് താഴെ കുറിക്കുന്നു.
ഡിസംബറിൽ തന്നെ ചിത്രത്തിന്റെ റിലീസ് ഉണ്ടാകുമെന്ന് അണിയറ പ്രവർത്തകർ വ്യക്തമാക്കിയിരുന്നു. ചിത്രത്തിന്റെ ട്രെയ്ലറിനും ആദ്യ വീഡിയോ ഗാനത്തിനും വലിയ സ്വീകാര്യതയാണ് ലഭിച്ചത്.
Discussion about this post