തിരുവനന്തപുരം:സിപിഎം കേരളത്തിലെ വലിയൊരു അധോലോക സംഘമായി മാറിയെന്ന് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍. ഇപി ജയരാജന് മന്ത്രിയായപ്പോള്‍ നടത്തിയ അഴിമതികളിലെ ഒരു ഭാഗം മാത്രമാണ് ഇപ്പോള്‍ പുറത്തുവന്നിരിക്കുന്നതെന്നും അദ്ദേഹം പറഞ്ഞു. തിരുവനന്തപുരത്ത് നടന്ന വാര്‍ത്താ സമ്മേളനത്തില്‍ സംസാരിക്കുകയായിരുന്നു കെ. സുരേന്ദ്രന്‍.
ഇപി ജയരാജന് എതിരായി ഇപ്പോള്‍ ഉയര്‍ന്നിരിക്കുന്ന ആനധികൃത സ്വത്ത് സമ്പാദന ആരോപണം സിപിഎമ്മിലെ വലിയ അഴിമതിക്കാരുടെ നിരയിലേക്ക് വിരല്‍ ചൂണ്ടുകയാണ്. പൊതുപ്രവര്‍ത്തന അഴിമതി നിരോധന നിയമത്തിന് കീഴില്‍ വരുന്നതാണ് ഇതെന്നും അദ്ദേഹം കുറ്റപ്പെടുത്തി. ഇപിക്കെതിരെ അന്വേഷണം നടന്നാല്‍ പല കാര്യങ്ങളും പുറത്തറിയും എന്ന ഭയം മുഖ്യമന്ത്രിക്കുണ്ടെന്നും അദ്ദേഹത്തിന്റെ അറിവോടുകൂടിയാണോ ഈ അഴിമതികള്‍ നടന്നത് എന്നടക്കമുള്ള കാര്യങ്ങള്‍ വ്യക്തമാക്കണമെന്നും കെ.സുരേന്ദ്രന്‍ ആവശ്യപ്പെട്ടു.
സിപിഎം നേതാക്കള്‍ക്ക് സ്വര്‍ണക്കടത്ത്-ക്വട്ടേഷന്‍-ലഹരി മാഫിയ സംഘങ്ങളുമായി ബന്ധമുണ്ട്. കണ്ണൂരിലും തിരുവനന്തപുരത്തും മാത്രമല്ല, എല്ലാ സ്ഥലത്തും ഇതാണ് അവസ്ഥയെന്നും കെ. സുരേന്ദ്രന്‍ വാര്‍ത്താ സമ്മേളനത്തില്‍ ചൂണ്ടിക്കാട്ടി. ജയരാജന് ഇത്രയും സ്വത്ത് എവിടെനിന്നും സമ്പാദിച്ചെന്ന് സിപിഎം ജനങ്ങളോട് പറയണമെന്നും അദ്ദേഹം ആവശ്യപ്പെട്ടു.
Discussion about this post