കുതിച്ച് ചാട്ടത്തിന് പിന്നാലെ തിരിച്ചിറങ്ങി സ്വർണവില; പവൻ വില വീണ്ടും 40,000 ലേക്ക്

എറണാകുളം: കുതിച്ചു കയറ്റത്തിന് പിന്നാലെ തിരിച്ചിറങ്ങി സംസ്ഥാനത്തെ സ്വർണ വില. പവന് 320 രൂപ കുറഞ്ഞു. 40,720 രൂപയാണ് ഒരു പവൻ സ്വർണത്തിന്റെ ഇന്നത്തെ വില.

ഗ്രാമിന് 40 രൂപയുടെ കുറവാണ് സ്വർണ വിലയിൽ ഉണ്ടായത്. ഇതോടെ ഒരു ഗ്രാം സ്വർണത്തിന് 5090 രൂപയാണ് വിപണി വില. 18 കാരറ്റ് സ്വർണത്തിന്റെ വിലയിലും കുറവ് ഉണ്ടായിട്ടുണ്ട്. ഗ്രാമിന് 35 രൂപയാണ് കുറഞ്ഞത്. 18 കാറ്റ് സ്വർണം ഗ്രാമിന് 4025 രൂപ നിരക്കിലാണ് വ്യാപാരം പുരോഗമിക്കുന്നത്.

മൂന്ന് ദിവസത്തെ തുടർച്ചയായ വർദ്ധനവിന് ശേഷമാണ് സ്വർണ വിലയിൽ നേരിയ കുറവ് ഉണ്ടായിരിക്കുന്നത്. ഇന്നലെ സ്വർണം പവന് 41,040 രൂപയായിരുന്നു വിപണി വില. 160 രൂപ ഉയർന്നതോടെയാണ് പവന് 41,000 പിന്നിട്ടത്. ജനുവരി രണ്ടിന് ശേഷം സ്വർണ വിലയിൽ തുടർച്ചയായ വർദ്ധനവാണ് രേഖപ്പെടുത്തിയത്. മൂന്ന് ദിവസത്തിനിടെ 680 രൂപ വർദ്ധിച്ചിരുന്നു.

അതേസമയം സ്വർണവിലയിൽ ഉണ്ടായ ഇടിവ് ഉപഭോക്താക്കളിൽ നേരിയ ആശ്വാസം ഉണ്ടാക്കിയിട്ടുണ്ട്. വില കുറയുന്ന ദിവസങ്ങൾ സ്വർണം വാങ്ങാൻ അനുകൂലമാക്കുകയാണ് നിലവിൽ ഉപഭോക്താക്കൾ ചെയ്യുന്നത്.