മലപ്പുറം: മുസ്ലിം ലീഗിൽ നിന്ന് ഓൺലൈൻ വഴി അംഗത്വം നേടിയവരുടെ പട്ടിക പരിശോധിച്ച് ലീഗ് നേതൃത്വം ഞെട്ടി. മമ്മൂട്ടിക്കും ഷാരൂഖ് ഖാനും ആസിഫ് അലിക്കും മിയ ഖലീഫയ്ക്കും ലീഗിൽ അംഗത്വം കിട്ടിയതാണ് നേതൃത്വത്തെ അമ്പരപ്പിച്ചത്. തിരുവനന്തപുരം നേമം മണ്ഡലത്തിൽ കളിപ്പാൻ കുളം വാർഡിലാണ് സംഭവം. കഴിഞ്ഞ ഡിസംബർ 31 ന് അംഗത്വ വിതരണം അവസാനിച്ചപ്പോൾ പട്ടിക പരിശോധിച്ചപ്പോഴാണ് സെലിബ്രിറ്റികൾക്കും അംഗത്വം കിട്ടിയത് തിരിച്ചറിയുന്നത്.
വീടുകൾ തോറും കയറി ഇറങ്ങി അംഗത്വ വിതരണം നടത്താനാണ് പാർട്ടി നേതൃത്വം നിർദ്ദേശിച്ചിരുന്നത്. അംഗത്വം ലഭിച്ചവർ വിവരങ്ങളും ഫോൺ നമ്പരും ഓൺലൈനായി നൽകണം. പിന്നീട് കോഴിക്കോടുള്ള ഐടി കോഡിനേറ്റർ ഇത് പരിശോധിക്കും. ആൾ ബലമില്ലാത്ത സ്ഥലങ്ങളിൽ കമ്പ്യൂട്ടർ സെന്ററുകളെ ഏൽപ്പിച്ചതാണ് കാരണമെന്നാണ് സൂചന. വിഷയത്തിൽ പാർട്ടി നേതൃത്വം അന്വേഷണം ആരംഭിച്ചിട്ടുണ്ട്.സംസ്ഥാനത്ത് ലീഗിന്റെ അംഗസംഖ്യ 24.33 ലക്ഷം ആയെന്നാണ് കണക്ക്.
വാർത്ത പുറത്തുവന്നതോടെ സാമൂഹ്യ മാദ്ധ്യമങ്ങളിൽ ട്രോളുകളും ഇറങ്ങി. കോട്ടയത്ത് കേരള കോൺഗ്രസിൽ യേശു ക്രിസ്തുവിനു വരെ അംഗത്വമുണ്ടെന്ന രസകരമായ അഭിപ്രായങ്ങളും വാർത്തയ്ക്ക് മറുപടിയായി വരുന്നുണ്ട്.
Discussion about this post