ഭോപ്പാൽ: മധ്യപ്രദേശിലെ ഝബുവ, അലിരാജ്പൂർ ജില്ലകളുടെ സാംസ്കാരിക വ്യാപാരമുദ്രയായ ഗുഡ്ഡൻ-ഗുഡിയ പാവകൾ ജർമ്മനി, സ്വിറ്റ്സർലൻഡ്, ഹോങ്കോംഗ് തുടങ്ങിയ രാജ്യങ്ങളിലേക്കും. അവിടെ സ്ഥിരതാമസമാക്കിയ പ്രവാസികളാണ് ഇതുമായി ബന്ധപ്പെട്ട കയറ്റുമതിയ്ക്കായി സർക്കാരിനെ സമീപിച്ചിരിക്കുന്നത്. ജനുവരി 8 നും 10 നും ഇടയിൽ ഇൻഡോറിൽ നടന്ന പ്രവാസി ഭാരതീയ ദിവസിലേക്ക് ക്ഷണിക്കപ്പെട്ടവരിൽ പലരും ഇതിൽ താൽപ്പര്യം പ്രകടിപ്പിക്കുകയും ചിലർ സമ്മേളനത്തിൽ പാവകളുമായി എത്തുകയും ചെയ്തിരുന്നു.
1980-കളിൽ ഝബുവ നിവാസിയായ ഉദ്ധവ് ഗിദ്വാനിയാണ് പാവ നിർമ്മാണ പ്രക്രിയ വാണിജ്യവത്കരിക്കാൻ തീരുമാനിച്ചത്. ഇതിനു ശേഷമാണ് ഈ പ്രദേശത്ത് നിന്ന് പാവകളെ പുറം രാജ്യങ്ങളിലേക്ക് അടക്കം അയക്കാൻ ആരംഭിച്ചത്. ഇത് വരെ തദ്ദേശീയരായ ഭിൽ, ഭിൽവാല ഗോത്രങ്ങളുടെ കീഴിലാണ് ഈ പാവ നിർമ്മാണം നടന്നിരുന്നത്. നിലവിൽ ഇന്ത്യയുടെ മറ്റ് ഭാഗങ്ങളിലും ഇതിന്റെ വിൽപ്പനയും, നിർമ്മാണവും നടക്കുന്നുണ്ട്.
ഈ പാവകൾ ഇവിടത്തെ ആദിവാസികളുടെ ജീവിതരീതിയെയും വസ്ത്രധാരണത്തെയും പ്രതിനിധീകരിക്കുന്നു. തുണികൊണ്ടുണ്ടാക്കിയതിനാൽ ഇവ വളരെക്കാലം നിലനിൽക്കും, അതിനാൽ കൊണ്ടുപോകുന്ന സമയത്ത് കേടുപാടുകൾ സംഭവിക്കുമെന്ന ഭയമില്ല. നിങ്ങൾക്ക് എല്ലായിടത്തും ബാർബി ഡോളുകൾ ലഭിച്ചേക്കാം, എന്നാൽ ഇത് ജാബുവയുടെ പ്രത്യേകതയാണ്, – ഉദ്ധവ് ഗിദ്വാനിയുടെ മകൻ സുഭാഷ് പറയുന്നു. കോട്ടൺ തുണി, കമ്പികൾ എന്നിവ ഉപയോഗിച്ചാണ് പാവകൾ നിർമ്മിച്ചിരിക്കുന്നത്. ഒരു കരകൗശല വിദഗ്ധന് ഒരു ദിവസം നാല് പാവകളെ നിർമ്മിക്കാൻ കഴിയുമെന്നും അദ്ദേഹം പറഞ്ഞു. ജർമ്മനി, സ്വിറ്റ്സർലൻഡ് തുടങ്ങിയ രാജ്യങ്ങളിൽ സ്ഥിരതാമസമാക്കിയ നിരവധി ആളുകൾ ഞങ്ങളുടെ കോൺടാക്റ്റ് നമ്പർ വാങ്ങിയിട്ടുണ്ടെന്നും അദ്ദേഹം വ്യക്തമാക്കി.
പാവകളുടെ പ്രോട്ടോടൈപ്പുകൾ നിർമ്മിച്ച് സിംഗപ്പൂർ പോലുള്ള തെക്കുകിഴക്കൻ ഏഷ്യയിലെ രാജ്യങ്ങളിലും വിൽക്കാൻ ആഗ്രഹിക്കുന്നതായി പ്രവാസികളിൽ പലരും പറയുന്നു. സിംഗപ്പൂരിൽ, ലിറ്റിൽ ഇന്ത്യയും ചൈനാ ടൗണും പോലുള്ള പ്രദേശങ്ങളുണ്ട്. അവിടങ്ങളിൽ പാവകൾക്ക് വലിയ വിപണി ലഭിക്കുമെന്നും ഉത്പാദകർ കണക്ക് കൂട്ടുന്നു.
