മികച്ച പ്രേക്ഷകപ്രീതി നേടി മുന്നേറുകയാണ് ഉണ്ണി മുകുന്ദൻ നായകനായെത്തിയ മാളികപ്പുറം. സമീപകാല മലയാള സിനിമകളിലെ ശ്രദ്ധേയമായ വിജയങ്ങളിൽ ഒന്നായി മാറിയിരിക്കുകയാണ് ചിത്രം. റിലീസ് ചെയ്ത് മൂന്നാം വാരത്തിലേക്ക് പ്രവേശിക്കുമ്പോഴേക്കും 25 കോടി ക്ലബ്ബിൽ കയറിയിരിക്കുകയാണ് മാളികപ്പുറം. ഇപ്പോൾ ചിത്രം കണ്ടിറങ്ങിയ ഒരു മുത്തച്ഛനും ചിത്രത്തിൽ കല്ലുവായി എത്തിയ കുട്ടിയും തമ്മിലുള്ള സംഭാഷണത്തിന്റെ മനോഹരമായ വീഡിയോ സമൂഹമാദ്ധ്യമങ്ങളിൽ പങ്കുവച്ചിരിക്കുകയാണ് ചിത്രത്തിന്റെ തിരക്കഥാകൃത്ത് കൂടിയായ അഭിലാഷ് പിള്ള.
” 90 വയസ്സുള്ള ഒരു മുത്തശ്ശനും 9 വയസ്സുള്ള കല്ലുവും തമ്മിലുള്ള ഈ സംസാരത്തിലുണ്ട് മാളികപ്പുറം സിനിമയുടെ വിജയം. സിനിമ കണ്ടു കരഞ്ഞു കൊണ്ടു വന്ന് നന്ദി പറയുന്ന പ്രേക്ഷകരെ കാണുമ്പോൾ ശെരിക്കും കരയുന്നത് ഞങ്ങൾ മാളികപ്പുറം ടീമാണ്.തൃപ്പൂണിത്തുറ സെൻട്രൽ തിയേറ്ററിൽ നിന്നുള്ള കാഴ്ച” ആണെന്ന് വ്യക്തമാക്കിക്കൊണ്ടാണ് അദ്ദേഹം വീഡിയോ പങ്കുവച്ചിരിക്കുന്നത്. കണ്ണുനിറഞ്ഞു കൊണ്ട് മുത്തച്ഛൻ കല്ലുവിനെ അനുഗ്രഹിക്കുന്നതാണ് വീഡിയോ. തനിക്ക് ഈ കാലത്ത് പതിനെട്ടാം പടി കയറാനാകില്ലെന്നും, കല്ലു പതിനെട്ടാം പടി കയറിയ കാഴ്ച തനിക്ക് ഏറെ സംതൃപ്തി തന്നുവെന്നുമാണ് മുത്തച്ഛൻ കുഞ്ഞിനോട് പറയുന്നത്. നന്നായി ചെയ്തുവെന്നും കല്ലുവിന്റെ തലയിൽ കൈവച്ച് അനുഗ്രഹിച്ച് മുത്തച്ഛൻ പറയുന്നുണ്ട്.
ഡിസംബർ 30നാണ് മാളികപ്പുറം കേരളത്തിലെ തീയേറ്ററുകളിൽ റിലീസ് ചെയ്തത്. 140 സ്ക്രീനുകളിലായിരുന്നു ചിത്രം ആദ്യവാരം റിലീസ് ചെയ്തത്. രണ്ടാം വാരത്തിലേക്ക് കടന്നപ്പോൾ 170 സ്ക്രീനുകളിലാണ് ചിത്രം പ്രദർശിപ്പിച്ചത്. ചിത്രത്തിന്റെ ഡബ്ബിംഗ് പതിപ്പ് ഉടൻ മറ്റ് സംസ്ഥാനങ്ങളിലും റിലീസ് ചെയ്യും. തെല്ലുങ്ക് സൂപ്പർ സ്റ്റാർ അല്ലു അർജ്ജുന്റെ കമ്പനിയായ ഗീത ആർട്സാണ് തെലുങ്ക് പതിപ്പിന്റെ വിതരാണാവകാശം നേടിയിരിക്കുന്നത്. ചിത്രം ജനുവരി 20നാണ് റിലീസ് ചെയ്യുന്നത്.
Discussion about this post