സമയം നോക്കുന്നത് മാത്രമല്ല, ആപ്പിൾ വാച്ചിനെ ഒരു ഡോക്ടറെന്ന് കൂടി ആരാധകര്‍ വിളിക്കാറുണ്ട്. കാരണം സെൻസറുകൾ ഉപയോഗിച്ച് ഉപയോക്താക്കളുടെ ഹൃദയമിടിപ്പ്, ഇസിജി തുടങ്ങിയവ മനസിലാക്കുകയും, അത് വഴി ആളുകളുടെ ജീവൻ രക്ഷിക്കുകയും ചെയ്ത വാർത്തകൾ പല തവണ കേട്ടിട്ടുണ്ട്. ഇപ്പോൾ ബ്രിട്ടനിൽ നിന്നുള്ള ഒരു സ്ത്രീ ആപ്പിൾ വാച്ച് തന്നെ മരണത്തിൽ നിന്ന് രക്ഷപെടുത്തിയെന്ന അവകാശവാദവുമായി രംഗത്തെത്തിയിരിക്കുകയാണ്.
ഹൃദയസംബന്ധമായ അസുഖത്തെക്കുറിച്ച് ആപ്പിൾ വാച്ച് തനിക്ക് കൃത്യമായ മുന്നറിയിപ്പ് തന്നുവെന്നാണ് 59കാരിയായ എലെയ്ൻ തോംസൺ പറയുന്നത്. അസുഖങ്ങളെ തുടർന്ന് 2022 മുതൽ എലെയ്ൻ ആപ്പിൾ വാച്ച് ഉപയോഗിക്കാറുണ്ടായിരുന്നു. അടുത്തിടെയാണ് എലെയ്‌ന്റെ ഹൃദയമിടിപ്പിൽ ചില പ്രശ്‌നങ്ങളുണ്ടെന്ന് ആപ്പിൾ മുന്നറിയിപ്പ് നൽകിയത്. എന്നാൽ എലെയ്‌ന് യാതൊരു വിധ അസ്വസ്ഥതകളോ ക്ഷീണമോ ഉണ്ടായിരുന്നില്ല.
ആപ്പിളിന്റെ സന്ദേശത്തിന് പിന്നാലെ എലെയ്ൻ ഒരു കാർഡിയോളജിസ്റ്റിനെ സന്ദർശിച്ചു. ഹൃദയാഘാതത്തിന് വരെ സാധ്യതയുള്ള അവസ്ഥയിലായിരുന്നു എലെയ്ൻ. അസാധാരണമായ രീതിയിൽ ഹൃദയമിടിപ്പ് രേഖപ്പെടുത്തിയതോടെ ഒരു പേസ്‌മേക്കർ ഘടിപ്പിക്കുകയും ചെയ്തു. ഈ പ്രശ്‌നത്തെ കുറിച്ച് തന്നെ ബോധവതിയാക്കിയതും, ഡോക്ടറെ കാണാൻ പോകാൻ കാരണവും ആപ്പിൾ വാച്ചാണെന്ന് എലെയ്ൻ പറയുന്നു. താൻ ഇപ്പോഴും എല്ലാ സമയത്തും ആപ്പിൾവാച്ച് ധരിക്കാറുണ്ടെന്നും ഇവർ പറയുന്നു.
Discussion about this post