തിരുവനന്തപുരം: പ്രധാനമന്ത്രിയെയും രാജ്യത്തെയും അപമാനിക്കുന്ന ബിബിസി ഡോക്യുമെന്ററിക്കെതിരെ നിലപാട് സ്വീകരിച്ച് കോൺഗ്രസിൽ നിന്നും രാജിവെച്ച മുതിർന്ന നേതാവ് എ കെ ആന്റണിയുടെ മകൻ അനിൽ ആന്റണിയെ അഭിനന്ദിച്ച് ബിജെപി നേതാവ് എ പി അബ്ദുള്ളക്കുട്ടി. അനിൽ ആന്റണിയുടെ നിലപാട് ദേശസ്നേഹ പ്രചോദിതമാണെന്ന് അബ്ദുള്ളക്കുട്ടി പറഞ്ഞു.
ഇന്ത്യയുടെ പരമാധികാരത്തിനെതിരെ കുതിരകയറാൻ വന്ന ബിബിസിയെ ചോദ്യം ചെയ്ത അനിൽ ആന്റണി യുടെ നിലപാട് മഹത്തരമാണ്. രാജ്യവും, അതിന്റെ നീതിന്യായ വ്യവസ്ഥയും, വലിയ വെല്ലുവിളി നേരിട്ട വിഷയത്തിൽ ധീരമായ നിലപാട് എടുത്തത്തിന്റെ പേരിൽ അദ്ദേഹത്തിന് കോൺഗ്രസ്സിൽ നിന്ന് രാജി വെക്കേണ്ടി വന്നിരിക്കുന്നു. അനിലിനെ തള്ളിപ്പറഞ്ഞതിലൂടെ കോൺഗ്രസ് നേതൃത്വം ദേശവിരുദ്ധരുടെ താവളമായി മാറിയിരിക്കുന്നു എന്ന് ഒരിക്കൽ കൂടി നമ്മെ ബോധ്യപ്പെടുത്തുകയുണ്ടായെന്ന് അബ്ദുള്ളക്കുട്ടി പറഞ്ഞു.
പിറന്ന നാടിന്റെ അഭിമാന സംരക്ഷണത്തിന് തയ്യാറായ അനിലിനെ നെഞ്ചോട് ചേർത്ത് അഭിനന്ദിക്കുന്നു. നന്മയുടെ തരി ബാക്കി നിൽക്കുന്ന മനസ്സുകൾക്ക് രാഹുൽ കമ്പനിയിൽ നിൽക്കാനാവില്ലെന്നും ഫേസ്ബുക്കിൽ അബ്ദുള്ളക്കുട്ടി കുറിച്ചു.
