വൈറലാകാന് വ്യത്യസ്തമായ ഉള്ളടക്കം തേടിയുള്ള ഓട്ടത്തിലാണ് കണ്ടന്റ് ക്രിയേറ്റര്മാര്. എന്തിന് ഉള്ളടക്കങ്ങളെ കുറിച്ചുള്ള തങ്ങളുടെ ആലോചനകളെ പോലും അവര് ഒരു കണ്ടന്റ് ആക്കി മാറ്റിയെന്നിരിക്കും. ചിരിപ്പിക്കുകയും ചിന്തിപ്പിക്കുകയും ഞെട്ടിക്കുകയും അമ്പരപ്പിക്കുകയും ചെയ്യുന്ന എത്രയേറെ ഉള്ളടക്കങ്ങളാണ് ഓരോ ദിവസവും സോഷ്യല്മീഡിയയില് ചൂടപ്പം പോലെ വന്ന് നിറയുന്നത്.
അമ്പരപ്പിക്കുന്ന, നാടന് ശൈലിയില് പറഞ്ഞാല് മൂക്കത്ത് വിരല് വെച്ചുപോകുന്ന ഉള്ളടക്കത്തിനും ഇന്റെര്നെറ്റ് ലോകത്ത് ഒരു പഞ്ഞവുമില്ല. പാചക വീഡിയോകള് മുതല് അടിപിടി വരെ സോഷ്യല്മീഡിയ അക്കൗണ്ടുകളിലൂടെ വിരലോടിക്കുമ്പോള് മൂക്കത്ത് വിരല് വെച്ച് എന്റമ്മോ എന്തൊക്കെയായിത് എന്ന് പറയിപ്പിക്കുന്ന വിചിത്രമായ ഫീഡുകള് ഒരു ദിവസം പോലും നമ്മള് കാണാതിരിക്കില്ല. അത്തരമൊരു കണ്ടന്റ് നല്കിയ അമ്പരപ്പിലാണ് ഇപ്പോള് സോഷ്യല്മീഡിയ.
ബ്രൈഡല് മേക്ക് ഓവറും വീഡിയോയും എല്ലാം കുറേ കാലമായി വ്യത്യസ്തയ്ക്ക് പിറകേ ഓടുന്നു. ഒന്ന് ശ്രദ്ധിക്കപ്പെടാന് ഏതറ്റം വരെയും പോകാന് തയ്യാറാകുന്നവരുണ്ട്. അങ്ങനെ വ്യത്യസ്തമായ ഒരു ഹെയര്സ്റ്റെലുമായി വിവാഹദിനത്തില് ശ്രദ്ധിക്കപ്പെടാന് ഒരു വധു നടത്തിയ ശ്രമം കണ്ട് ഇന്റെര്നെറ്റ് ഒന്നാകെ അമ്പരന്നു. മുടി മുഴുവന് മിഠായി തിരുകി ഇതുവരെ ആരും പരീക്ഷിക്കാത്തൊരു ഹെയര്സ്റ്റൈലാണ് ഈ വധു പരീക്ഷിച്ചത്. ഈ വ്യത്യസ്ത ഹെയര്ഡോയുടെ വീഡിയോയും ഇന്സ്റ്റഗ്രാം റീലുമെല്ലാം മണിക്കൂറുകള് കൊണ്ട് വൈറലായി.
View this post on Instagram
മെയ്ക്ക് ഓവര് പോസ്റ്റുകള് കൊണ്ട് ശ്രദ്ധേയമായ ‘ചിത്രാസ് മെയ്ക്ക്-അപ്പ് സ്റ്റുഡിയോ’ ആണ് ഇന്സ്റ്റഗ്രാമില് ഈ റീല് പങ്കുവെച്ചിരിക്കുന്നത്. 6.8 ദശലക്ഷത്തിലധികം കാഴ്ചകളും 223k ലൈക്കുകളുമാണ് റീല് നേടിയത്. ‘ചോക്കലേറ്റ് ഹെയര്-ഡോ’ എന്നായിരുന്നു റീലിന്റെ ക്യാപ്ഷന്.
വീഡിയോയില് വധുവിന്റെ മുടി മുഴുവന് മുല്ലപ്പൂ വെച്ചത് പോലെ മിഠായി കൊണ്ട് നിറച്ചിരിക്കുന്നു. എക്ലെയര്, മില്ക്കിബാര്, ഫൈവ്-സ്റ്റാര്, കിറ്റ് കാറ്റ് അടക്കം പലവിധ മിഠായികളാണ് മുടി അലങ്കരിക്കാന് ഉപയോഗിച്ചിരിക്കുന്നത്. കമ്മലുകളിലും മാലയിലും നെറ്റിച്ചുട്ടിയിലും മിഠായി വെച്ച് വ്യത്യസ്തത ആവോളം കൊണ്ടുവന്നിട്ടുണ്ട് ഹെയര്സ്റ്റൈലിസ്റ്റ്.
വീഡിയോയ്ക്ക് ലഭിച്ചിരിക്കുന്ന കമന്റുകള് ആണ് ബഹുരസം. കുട്ടികളെ സൂക്ഷിച്ചോ എന്നും മറ്റുമായി ചോക്കലേറ്റ് ഹെയര്-ഡോയെ അനുകൂലിച്ചും പ്രതികൂലിച്ചും നിരവധിപേര് കമന്റുകള് ഇട്ടിട്ടുണ്ട്.
Discussion about this post