അബുദാബി: ആറുമാസത്തിലധികം കാലം വിദേശത്ത് കഴിയുന്ന യുഎഇ താമസ വിസ കൈവശമുള്ളവര്ക്ക് ഇനി മുതല് റീ-എന്ട്രി പെര്മിറ്റിന് അപേക്ഷിച്ച് രാജ്യത്തേക്ക് തിരിച്ചെത്താം. യുഎഇയിലെ ഫെഡറല് അതോറിറ്റി ഫോര് ഐഡിന്റിറ്റി സിറ്റിസണ്ഷിപ്പ്, കസ്റ്റംസ് ആന്ഡ് പോര്ട്ട് സെക്യൂരിറ്റി (ഐസിപി) ആണ് ഈ പുതിയ പെര്മിറ്റ് സംബന്ധിച്ച പ്രഖ്യാപനം നടത്തിയത്.
റീ-എന്ട്രി പെര്മിറ്റിന് അപേക്ഷിക്കുന്നവര് ഇത്രയുമധികം കാലം വിദേശത്ത് കഴിയാനുള്ള കാരണവും അതിനുള്ള തെളിവും അധികൃതര്ക്ക് നല്കണം. ഐസിപി വെബ്സൈറ്റിലെ സ്മാര്ട്ട് സര്വ്വീസസ് മുഖേന താമസ വിസ കൈവശമുള്ളവര്ക്ക് റീ-എന്ട്രിക്കായി അപേക്ഷിക്കാം. സ്മാര്ട്ട് സര്വ്വീസ് സെന്ററുകള് അഥവാ ടൈപ്പിംഗ് സെന്ററുകള് മുഖേനയും റീ-എന്ട്രിക്കായി അപേക്ഷിക്കാവുന്നതാണ്. ഐസിപിയില് നിന്നും റീ-എന്ട്രി അനുമതി ലഭിച്ച അറിയിപ്പ് ഇ-മെയില് മുഖേന വന്ന അപേക്ഷകര്ക്ക് രാജ്യത്തേക്ക് തിരിച്ചെത്താം. അതേസമയം അപേക്ഷ സമര്പ്പിച്ച് കേവലം അഞ്ചുദിവസങ്ങള് കൊണ്ട് അനുമതി നേടാനാകും.
പ്രവാസികള്ക്കുള്ള റീ-എന്ട്രി പെര്മിറ്റിന്റെ കാലാവധി, അനുമതി സംബന്ധിച്ച അറിയിപ്പ് ഇ-മെയില് വന്ന് 30 ദിവസങ്ങള് ആയിരിക്കും. നിലവില് 180 ദിവസമോ അതിലധികമോ വിദേശത്ത് കഴിയുന്ന യുഎഇ താമസ വിസ കൈവശമുള്ളവരുടെ വിസ സ്വമേധയാ കാലഹരണപ്പെടും. ഗോള്ഡന് വിസ ഉള്ളവര്ക്ക് മാത്രമാണ് ഇതില് ഇളവ് ലഭിക്കുക. ഇവര്ക്ക് എത്ര കാലം വരെയും വിദേശയത്ത് തുടരാം. വിദ്യാഭ്യാസം, ജോലി, വ്യക്തിപരമായ കാരണങ്ങള് എ്ന്നിവ മൂലം വിദേശത്ത് കഴിയുന്നവര്ക്ക് പുതിയ പെര്മിറ്റ് ചട്ടം ആശ്വാസമാകും.
പേര്, മൊബൈല് ഫോണ് നമ്പര്, ഇ-മെയില് വിലാസം എന്നിവയ്ക്ക് പുറമേ സ്പോണ്സറുടെ വിവരങ്ങള്, ഐഡി, പാസ്പോര്ട്ട് നമ്പറുകള് എന്നീ വിവരങ്ങളും അപേക്ഷാസമയത്ത് സമര്പ്പിക്കണം.
Discussion about this post