റോം: അടുത്ത വർഷം ഇന്ത്യ സന്ദർശിക്കുമെന്ന് ഫ്രാൻസിസ് മാർപ്പാപ്പ. കഴിഞ്ഞ ദിവസമാണ് അദ്ദേഹം ഇക്കാര്യം വ്യക്തമാക്കിയത്. ഈ വർഷം മംഗോളിയയിൽ സന്ദർശനം നടത്തുമെന്നും മാർപ്പാപ്പ അറിയിച്ചു.
ദക്ഷിണ സുഡാനിൽ നിന്നും റോമിലേക്കുള്ള മടക്കയാത്രയ്ക്കിടെയാണ് മാർപ്പാപ്പ ഇന്ത്യ സന്ദർശിക്കുന്ന കാര്യം സ്ഥിരീകരിച്ചത്. വത്തിക്കാനിലെ മാർപ്പാപ്പയുടെ ഓഫീസ് ഇക്കാര്യത്തിൽ വ്യക്തത വരുത്തിയതായാണ് വിവരം.
1999ൽ ജോൺ പോൾ രണ്ടാമൻ മാർപ്പാപ്പയ്ക്ക് ശേഷം ആദ്യമായാണ് ഒരു മാർപ്പാപ്പ ഇന്ത്യ സന്ദർശിക്കുന്നത്. പ്രധാനമന്ത്രി നരേന്ദ്ര മോദി റോം സന്ദർശനത്തിനിടെ മാർപ്പാപ്പയെ ഇന്ത്യയിലേക്ക് ക്ഷണിച്ചിരുന്നു. പ്രധാനമന്ത്രിയുടെ ക്ഷണം സ്വീകരിച്ചതായി മാർപ്പാപ്പ അറിയിച്ചിരുന്നു.
മാർപ്പാപ്പയുടെ ഇന്ത്യൻ സന്ദർശന തീയതി ഇന്ത്യൻ- വത്തിക്കാൻ വിദേശകാര്യ ഉദ്യോഗസ്ഥർ പരസ്പര ചർച്ചകൾക്ക് ശേഷം തീരുമാനിക്കും. 2024 ആദ്യം സന്ദർശനം ഉണ്ടാകും എന്നാണ് സൂചന.
