കടുവയെ കണ്ട് പഠിക്കണം റോഡുമര്യാദ: ഇരുവശവും നോക്കി ശ്രദ്ധയോടെ റോഡ് മുറിച്ച് കടന്ന് വിദ്വാന്‍

‘പണ്ടാണെങ്കില്‍ കണ്ണുമടച്ച് അങ്ങ് ഓടിയാല്‍ മതിയായിരുന്നു, ഇപ്പോഴങ്ങനെയാണോ കാടിനെ രണ്ടായി മുറിച്ച് റോഡ് പണിത് വെച്ചിരിക്കുകയല്ലേ മനുഷ്യന്‍. റോഡുമര്യാദ പാലിക്കാതെ അങ്ങ് ഓടിയാല്‍ എപ്പോള്‍ ലോറി കയറിയെന്ന് ചോദിച്ചാല്‍ മതി. അതുകൊണ്ട് മര്യാദയോടെ ഇരുവശവും നോക്കി വണ്ടിയൊന്നും ഇല്ലെന്ന് ഉറപ്പാക്കി റോഡ് മുറിച്ച് കടക്കാം.’ ഒരു കടുവയുടെ ആത്മഗതമാണ്.

ഇതൊരല്‍പ്പം കൂടിപ്പോയില്ലേ എന്നൊക്കെ വായിക്കുമ്പോള്‍ തോന്നുമെങ്കിലും അതീവ ശ്രദ്ധയോടെ റോഡ് മുറിച്ചുകടക്കുന്ന കടുവയുടെ വീഡിയോ കണ്ടാല്‍ ആ കടുവയും ഇതുപോലെ ചിന്തിച്ചിരിക്കാം എന്ന് കരുതുന്നതില്‍ തെറ്റൊന്നുമില്ല. ഇന്ത്യന്‍ ഫോറസ്റ്റ് സര്‍വ്വീസ് (ഐഎഫ്എസ്) ഓഫീസര്‍ സുശാന്ത നന്ദയാണ് ഈ വീഡിയോ സോഷ്യല്‍ മീഡിയയില്‍ പങ്കുവെച്ചത്.

ഇരുവശവും കാടായുള്ള ഒരു റോഡില്‍ വണ്ടികള്‍ എല്ലാം പോകുന്നത് വരെ അക്ഷോഭ്യനായി കാത്തുനിന്ന് ഇരുവശവും നോക്കി റോഡ് മറികടന്ന് കാട്ടില്‍ അപ്രത്യക്ഷനാകുന്ന കടുവയുടെ വീഡിയോ ഒരേസമയം കൗതുകകരവും സങ്കടകരവുമാണ്. വികസനം വന്യജീവികളെ ബാധിക്കുന്നത് ഇങ്ങനെയാണെന്ന അടിക്കുറിപ്പോടെയാണ് നന്ദ ട്വിറ്ററില്‍ വീഡിയോ പങ്കുവെച്ചിരിക്കുന്നത്.

This is how far the
‘development’ has taken our wildlife. pic.twitter.com/9J5eRrb8sd

— Susanta Nanda IFS (@susantananda3) February 7, 2023

ഈ വീഡിയോ എടുത്ത തീയ്യതിയോ സ്ഥലമോ അദ്ദേഹം വെളിപ്പെടുത്തിയിട്ടില്ല. ഏതായാലും വീഡിയോയ്ക്ക് മികച്ച പ്രതികരണമാണ് സാമൂഹ്യമാധ്യമങ്ങളില്‍ ലഭിച്ചത്. ചിലര്‍ വികസനത്തില്‍ സൈ്വര്യവിഹാരം നഷ്ടപ്പെട്ട മൃഗങ്ങളുടെ ദുരവസ്ഥയെ കുറിച്ചും മറ്റുചിലര്‍ മൃഗങ്ങള്‍ ഇങ്ങനെ റോഡ് മുറിച്ചുകടക്കുമ്പോള്‍ അവയ്ക്കുണ്ടാകാനിടയുള്ള അപകടങ്ങളെ കുറിച്ചുമെല്ലാം ആശങ്ക പങ്കുവെച്ചിട്ടുണ്ട്. വനപ്രദേശങ്ങളില്‍ എലിവേറ്റഡ് റോഡുകള്‍ വേണമെന്ന നിര്‍ദ്ദേശവും ആളുകള്‍ പങ്കുവെച്ചിട്ടുണ്ട്.