കേള്‍ക്കുമ്പോള്‍ അല്‍പ്പം വിചിത്രമായി തോന്നാം, എങ്കിലും മറ്റൊരു വഴിയും ഫലിക്കാതെ വന്നപ്പോള്‍ ഓരോ വര്‍ഷവും കഠിനമായിക്കൊണ്ടിരിക്കുന്ന സൂര്യന്റെ ചൂടില്‍ നിന്നും ഭൂമിയെ രക്ഷിക്കാന്‍ ശാസ്ത്രജ്ഞര്‍ക്ക് തോന്നിയ ഒരു ആശയമാണിത്. ചന്ദ്രനിലെ പൊടി അഥവാ ധൂളി, ഭൂമിക്കും സൂര്യനുമിടയിലെ ഗുരുത്വാകര്‍ഷണ പോയിന്റിലേക്ക് എത്തിക്കുക. ഇത് ആഗോളതാപനം കൊണ്ടുള്ള ദുരിതങ്ങളില്‍ നിന്ന് ഭൂമിക്ക് ഒരു പരിധി വരെ സംരക്ഷണം നല്‍കുമത്രേ.
സൂര്യ വികിരണം മൂലം ഭൂമി അമിതമായി ചൂട് പിടിക്കുന്നത് തടുക്കാനുള്ള മാര്‍ഗ്ഗങ്ങളെ കുറിച്ച് ശാസ്ത്രസമൂഹം ആലോചിക്കാന്‍ തുടങ്ങിയിട്ട് ദശാബ്ദങ്ങളായി. ബഹിരാകാശത്ത് ഭീമന്‍ സ്‌ക്രീന്‍ വെക്കുക, പ്രതിഫലനശേഷിയുള്ള വെളുത്ത മേഘങ്ങളെ സൃഷ്ടിക്കുക തുടങ്ങി പല ആശയങ്ങളും ഇതിനകം വന്നുവെങ്കിലും ഇവയൊന്നും ഇതുവരെ ചൂടില്‍ നിന്ന് ഭൂമിക്ക് സംരക്ഷണമേകിയിട്ടില്ല. ഈ സാഹചര്യത്തിലാണ് ചന്ദ്രോപരിതലത്തില്‍ നിന്നുള്ള പൊടിപടലങ്ങള്‍ (ധൂളികള്‍) കൊണ്ടുള്ള പരിഹാരം ശാസ്ത്രജ്ഞര്‍ മുന്നോട്ടുവെച്ചിരിക്കുന്നത്.
കാലാവസ്ഥ വ്യതിയാനത്തിന്റെ പ്രത്യാഘാതങ്ങളില്‍ വലയുന്ന ഭൂമിയിലേക്ക് അമിതമായി സൂര്യകിരണങ്ങളെത്തുന്ന തടുക്കാന്‍ ചന്ദ്രനില്‍ നിന്നുള്ള പൊടിക്ക് സാധിക്കുമെന്നാണ് ഇവര്‍ അഭിപ്രായപ്പെടുന്നത്. സൂര്യനും ഭൂമിക്കുമിടയില്‍ സ്ഥിതി ചെയ്യുന്ന ഒരു ബഹിരാകാശ നിലയത്തില്‍ നിന്നും ഈ പൊടി പറത്തിവിടാനാകുമെന്നും ശാസ്ത്രജ്ഞര്‍ പറയുന്നു. PLOS ക്ലൈമറ്റ് എന്ന ജേണലിലാണ് ഈ കണ്ടെത്തല്‍ പ്രസിദ്ധീകരിച്ചിരിക്കുന്നത്.
ഭൂമിയിലേക്കുള്ള സൂര്യകിരണങ്ങളുടെ വഴി ബഹിരാകാശത്ത് വെച്ച് തടയുകയാണ് ഏറ്റവും ഫലപ്രദമെന്നും പഠന റിപ്പോര്‍ട്ട് പറയുന്നുണ്ട്. ഭൂമിക്കും സൂര്യനുമിടയിലെ ‘L1 Lagrange’ പോയിന്റില്‍ സ്ഥാപിക്കുന്ന വലിയൊരു സ്‌ക്രീനിനോ അല്ലെങ്കില്‍ ഒരുകൂട്ടം ചെറിയ കൃത്രിമോപഗ്രഹങ്ങള്‍ക്കോ ഭൂമിക്ക് ഒരു മറയായി നില്‍ക്കാനായേക്കും.
സ്‌ക്രീനുകള്‍, വസ്തുക്കള്‍, ധൂളികള്‍ തുടങ്ങിയവ ഉപയോഗിച്ച് ഒന്നോ രണ്ടോ ശതമാനം സൂര്യരശ്മികളെ തടയുന്നതിനെ കുറിച്ച് കാലങ്ങളായി ശാസ്ത്രജ്ഞര്‍ ആലോചിക്കുന്നുണ്ട്.
Discussion about this post