ഓൺലൈൻ വഴി ഓർഡർ ചെയ്ത ബ്രെഡ് പാക്കറ്റിൽ ജീവനുള്ള എലി; ചിത്രങ്ങൾ പങ്കുവെച്ച് ഉപഭോക്താവ്

വിശന്നു വലഞ്ഞിരുന്നപ്പോൾ കഴിക്കാൻ ഓർഡർ ചെയ്ത ബ്രെഡ് പാക്കറ്റിൽ, ബ്രെഡിനൊപ്പം ജീവനുള്ള എലിയെ ലഭിച്ചതിന്റെ അങ്കലാപ്പിൽ ഉപഭോക്താവ്. നിതിൻ അറോറ എന്നയാളാണ് ബ്രെഡ് പാക്കറ്റിനൊപ്പം ലഭിച്ച ജീവനുള്ള എലിയുടെ ചിത്രം ട്വിറ്ററിൽ പങ്കുവെച്ചിരിക്കുന്നത്.

Most unpleasant experience with @letsblinkit , where alive rat was delivered inside the bread packet ordered on 1.2.23. This is alarming for all of us. If 10 minutes delivery has such baggage, @blinkitcares I would rather wait for a few hours than take such items.#blinkit #zomato pic.twitter.com/RHNOj6tswA

— Nitin Arora (@NitinA14261863) February 3, 2023

ഏറ്റവും അസുഖകരമായ അനുഭവം എന്നാണ് നിതിൻ അറോറ ഇതിനെ വിശേഷിപ്പിച്ചിരിക്കുന്നത്. ഓൺലൈൻ ഭക്ഷണ വിതരണ ആപ്പായ ബ്ലിങ്കിറ്റ് ആണ് എലിയെ നൽകി പുലിവാല് പിടിച്ചിരിക്കുന്നത്. ഫെബ്രുവരി ഒന്നാം തീയതിയാണ് സംഭവം.

പത്ത് മിനിറ്റിനുള്ളിൽ ഭക്ഷണം എത്തും എന്നത് കൊണ്ടാണ് ഓൺലൈൻ സേവനത്തെ ആശ്രയിച്ചത്. ഇതിലും ഭേദം ഒരു മണിക്കൂർ കാത്തിരിക്കുന്നതായിരുന്നു എന്നും നിതിൻ അഭിപ്രായപ്പെടുന്നു. വിഷയം കസ്റ്റമർ കെയറിനെ അറിയിച്ചപ്പോൾ, ആഭ്യന്തര അന്വേഷണം നടത്താം എന്നായിരുന്നു പ്രതികരണമെന്നും അദ്ദേഹം പറയുന്നു. കമ്പനി പിന്നീട് ക്ഷമാപണം നടത്തിയതിന്റെ സ്ക്രീൻ ഷോട്ടും നിതിൻ പങ്കുവെച്ചിട്ടുണ്ട്.

സംഭവം നിസാരമായി കാണാനാകില്ലെന്നും, കേസെടുക്കണമെന്നുമാണ് സാമൂഹിക മാദ്ധ്യമങ്ങളിൽ ഉയരുന്ന അഭിപ്രായങ്ങൾ. ബ്ലിങ്കിറ്റിൽ നിന്നും ഒരിക്കൽ തനിക്ക് ലഭിച്ചത് ചീഞ്ഞ ഭക്ഷണമാണെന്നും മറ്റൊരാൾ നിതിന്റെ ട്വീറ്റിന് താഴെ കമന്റ് ചെയ്തിട്ടുണ്ട്. ‘ഇംഗ്ലീഷ് അവ്ൻ‘ കമ്പനിയുടെ ബ്രെഡ് പാക്കറ്റിൽ നിന്നാണ് എലിയെ ലഭിച്ചത്.

സൊമാറ്റോയാണ് ഇന്ത്യയിൽ ബ്ലിങ്കിറ്റ് എന്ന കമ്പനിയെ ഏറ്റെടുത്തിരിക്കുന്നത്.