ട്രാഫിക് ബ്ലോക്കും സിഗ്നലുമൊന്നുമില്ലാത്ത റോഡിലൂടെ സഞ്ചരിക്കുക എന്നത് എല്ലാവരുടെയും ആഗ്രഹമാണ്. രാവിലെ എഴുന്നേറ്റ് ഓഫീസിലേക്ക് പോകുമ്പോൾ ഒരു തടസ്സം പോലുമില്ലാത്ത സുഗമമായ യാത്രയെപ്പറ്റി ചിന്തിച്ചിട്ടുണ്ടോ ? കൃത്യസമയത്ത് വീട്ടിൽ നിന്നിറങ്ങി ബ്ലോക്കിൽ പെടാതെ കൃത്യ സമയത്ത് ലക്ഷ്യസ്ഥാനത്ത് എത്തുന്ന കാലം എന്ന് വരുമെന്ന് നോക്കിയിരിക്കുകയാണ് പലരും. എന്നാൽ അത്തരത്തിൽ ഗതാഗത തടസ്സമില്ലാതെ യാത്ര ചെയ്യാനാകുന്ന ഒരു റോഡിന്റെ ഡിസൈൻ പങ്കുവെച്ചിരിക്കുകയാണ് പ്രമുഖ വ്യവസായി ആനന്ദ് മഹീന്ദ്ര.
2016 ൽ യെമനി എൻജിനീയർ മുഹമ്മദ് ആവാസ് ഡിസൈൻ ചെയ്ത മോഡലാണിത്. ട്രാഫിക് ലൈറ്റുകളില്ലാത്ത ട്രാഫിക് ‘ഹാഫ് റൗണ്ട് എബൗട്ടുകൾ’ ഉപയോഗിച്ച് സ്വയം നിയന്ത്രണത്തിലൂടെ യാത്ര ചെയ്യാനാകും എന്ന കുറിപ്പോടെയാണ് അദ്ദേഹമിത് പങ്കുവെച്ചത്. എന്നാൽ ഇത് പ്രാവർത്തികമാക്കുമ്പോൾ കൂടുതൽ ഇന്ധനം ആവശ്യം വരുമോ എന്നും ആനന്ദ് മഹീന്ദ്ര ചോദിക്കുന്നുണ്ട്.
Fascinating. A design by a Yemeni engineer Muhammad Awas (developed in 2016) which continuously regulates traffic without traffic lights using ‘half round-abouts'. But does it involve a higher use of fuel?
[source: https://t.co/iBIxKgbDzs] pic.twitter.com/83UV1vjmTb
— anand mahindra (@anandmahindra) February 23, 2023
വാഹനങ്ങൾ നിർത്താതെ റോഡിലൂടെ നീങ്ങുന്നതും തിരക്കില്ലാതെ ഹാഫ് റൗണ്ട്-എബൗട്ടുകളിൽ മാറിമാറി സഞ്ചരിക്കുന്നതും വീഡിയോയിൽ കാണാം. ഒരു സെക്കന്റ് പോലും വാഹനങ്ങൾക്ക് നിർത്തിയിടേണ്ട സാഹചര്യം വരുന്നില്ല.
വീഡിയോ വൈറലായതോടെ പ്രതികരണവുമായി നിരവധി പേർ രംഗത്തുണ്ട്. വ്യത്യസ്തമായ ഈ മോഡലിനെ നിരവധി പേർ പ്രശംസിക്കുന്നുണ്ടെങ്കിലും കൂടുതൽ ഇന്ധനം ആവശ്യമാവില്ലേ എന്ന ചോദ്യത്തിലാണ് എല്ലാവരും എത്തിനിൽക്കുന്നത്. എന്നാൽ റൗണ്ട് എബൗട്ടുകൾ അപകടസാധ്യത കുറയ്ക്കുമെന്ന പ്രതികരണങ്ങളും ലഭിക്കുന്നുണ്ട്. ഈ രീതി അനാവശ്യമാണെന്നും മൾട്ടി ഫ്‌ലൈ ഓവറുകളാണ് കൂടുതൽ ഉപകാരപ്രദമെന്നുമുള്ള അഭിപ്രായങ്ങളും ചിലർ പങ്കുവെയ്ക്കുന്നുണ്ട്.
