പുള്ളിമാനിനൊപ്പമുള്ളത് വെള്ളമാന്‍കിടാവ്; ഉത്തര്‍പ്രദേശിലെ കതര്‍നിയ ഘട്ടില്‍ നിന്നുള്ള അപൂര്‍വ്വ കാഴ്ച

അപൂര്‍വ്വയിനം ആല്‍ബിനോ മാനിനെ ഉത്തര്‍പ്രദേശിലെ കതര്‍നിയ ഘട്ട് വന്യജീവി സങ്കേതത്തില്‍ കണ്ടു. ഐഎഫ്എസ് ഓഫീസറായ ആകാശ് ദീപ് ബദ്ധ്‌വാന്‍ ആണ് ഫോട്ടോസഹിതം ഈ അപൂര്‍വ്വ കാഴ്ച ട്വിറ്ററില്‍ പങ്കുവെച്ചത്. കതര്‍നിയ ഘട്ടിന്റെ പരസ്യവാചകം – ‘അപൂര്‍വ്വമായത് ഇവിടെ സാധാരണം’, അന്വര്‍ത്ഥമാക്കിക്കൊണ്ട് ആല്‍ബിനോ പുള്ളിമാന്‍ കുട്ടിയെ കണ്ടുവെന്നാണ് ഓഫീസര്‍ ട്വിറ്ററില്‍ ചിത്രത്തിന് അടിക്കുറിപ്പായി എഴുതിയിരിക്കുന്നത്.

Staying true to its tagline, “Katarniaghat- Where rare is common”, an albino spotted deer fawn was sighted this morning.

PC – Pulkit Gupta, Gharial Conservation Team pic.twitter.com/KPYCQzTp1P

— Akash Deep Badhawan, IFS (@aakashbadhawan) March 9, 2023

ചിത്രത്തില്‍ അമ്മയെന്ന് തോന്നിക്കുന്ന പെണ്‍മാനിനൊപ്പം ആല്‍ബിനോ മാന്‍ നടന്നുപോകുന്നതായി കാണാം. കഴിഞ്ഞ തിങ്കളാഴ്ച രാവിലെയാണ് അപൂര്‍വ്വ കാഴ്ച കണ്ടതെന്നും ഐഎഫ്എസ് ഓഫീസര്‍ അറിയിച്ചിട്ടുണ്ട്. ട്വിറ്ററില്‍ നിരവധി പേരാണ് ആല്‍ബിനോ മാന്‍കുട്ടിയുടെ ചിത്രം പങ്കുവെച്ചിരിക്കുന്നത്. 15 വര്‍ഷം മുമ്പ് ഒഡിഷയിലെ അങ്കൂളില്‍ ഒരു സ്വര്‍ണ്ണമാനിനെ കണ്ടിരുന്നുവെന്ന് മറ്റൊരു ഐഎഫ്എസ് ഓഫീസറായ സുശാന്ത നന്ദ ചിത്രത്തിന് കമന്റായി കുറിച്ചിട്ടുണ്ട്.

നാഷണല്‍ ജോഗ്രഫിക്കിലെ വിവരം അനുസരിച്ച്, ശരീരത്തിന് നിറം നല്‍കുന്ന ഘടകങ്ങള്‍ പൂര്‍ണ്ണമായോ ഭാഗികമായോ ഇല്ലാതാകുന്നതിന്റെ ഫലമായാണ് ആല്‍ബിനോ മൃഗങ്ങള്‍ ഉണ്ടാകുന്നത്. സസ്തനികളിലാണെങ്കില്‍, ഒരു വ്യക്തിക്ക് മാതാപിതാക്കളില്‍ നിന്ന് ശരീരത്തിലെ മെലാനിന്‍ ഉല്‍പ്പാദനവുമായി ബന്ധപ്പെട്ട, ജനിതക വ്യതിയാനം സംഭവിച്ച ഒന്നോ അതിലധികമോ ജീനുകള്‍ പകര്‍ന്നുകിട്ടുമ്പോഴാണ് അല്‍ബിനിസം ഉണ്ടാകുന്നത്.

മനുഷ്യര്‍ക്ക് കാണാന്‍ രസകരമായ കാഴ്ചയാണെങ്കിലും കാട്ടില്‍ ആല്‍ബിനോ മൃഗങ്ങളുടെ അതിജീവനം വളരെ ശ്രമകരമാണ്. പൊതുവേ ഇത്തരം മൃഗങ്ങള്‍ക്ക് കാഴ്ചശക്തി കുറവായിരിക്കും. അതുകൊണ്ടുതന്നെ ഭക്ഷണം തേടിയിറങ്ങുമ്പോള്‍ ശത്രുക്കളുടെ കാഴ്ചയില്‍ നിന്ന് ഒളിച്ചിരിക്കാനും ഓടി രക്ഷപ്പെടാനുമെല്ലാം പാടാണ്. ഇവയ്ക്ക് ഇണയെ കണ്ടെത്താനും പാടാണ്.