തിരുവനന്തപുരം: കടുത്ത വേനലിൽ വെന്തുരുകുന്ന കേരളക്കരയ്ക്ക് ആശ്വാസമായി വേനൽ മഴ തുടരാൻ സാധ്യതയെന്ന് വിവരം. കേന്ദ്രകാലാവസ്ഥാ വകുപ്പാണ് ഇക്കാര്യം അറിയിച്ചത്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം എറണാകുളം, ഇടുക്കി, പാലക്കാട്, മലപ്പുറം, വയനാട് ജില്ലകളിൽ ജില്ലകളിൽ ഇന്ന് നേരിയ മഴയ്ക്ക് സാധ്യതയുണ്ട്.
ഞായറാഴ്ച്ച വരെ തെക്കൻ കേരളത്തിലെയും മദ്ധ്യകേരളത്തിലെയും ഒറ്റപ്പെട്ടയിടങ്ങളിൽ വേനൽ മഴ ലഭിച്ചേക്കും. മലയോര മേഖലകളിൽ ഇടിമിന്നലോട് കൂടിയ മഴയ്ക്കാണ് സാധ്യത.
അതേസമയം വിഷപ്പുകയ്ക്ക് ശേഷം കൊച്ചിയിൽ ആശ്വാസമായി പെയ്തത് ആസിഡ് മഴയെന്ന് വിദഗ്ധർ ചൂണ്ടിക്കാട്ടി. വേനൽ മഴയിൽ ആസിഡിന്റെ സാന്നിദ്ധ്യമുണ്ടെന്ന് രാജഗോപാൽ കമ്മത്താണ് ചൂണ്ടിക്കാട്ടിയത്. ലിറ്റമസ് പേപ്പർ ഉപയോഗിച്ചുള്ള ടെസ്റ്റിലൂടെയാണ് ആസിഡിന്റെ സാന്നിദ്ധ്യം അദ്ദേഹം തെളിയിച്ചത്.
