മലയാളി പ്രേക്ഷകരുടെ പ്രിയപ്പെട്ട അവതാരകനായ ജീവ ജോസഫും ഭാര്യ അപർണ തോമസും 11 വർഷത്തെ ദാമ്പത്യജീവിതത്തിന് ശേഷം വേർപിരിയുന്നു. തങ്ങളുടെ വിവാഹ ദിവസം തന്നെ ഇൻസ്റ്റാഗ്രാമിൽ പങ്കുവെച്ച അതീവ പക്വതയാർന്ന കുറിപ്പിലൂടെയാണ് ജീവ ഈ വിവരം ആരാധകരുമായി പങ്കുവെച്ചത്. കഴിഞ്ഞ കുറച്ചു നാളുകളായി ഇരുവരും ഒരുമിച്ചുള്ള ചിത്രങ്ങളോ വീഡിയോകളോ സോഷ്യൽ മീഡിയയിൽ പങ്കുവെക്കാതിരുന്നതിനെ തുടർന്ന് ഇവർക്കിടയിൽ അസ്വാരസ്യങ്ങളുണ്ടെന്ന തരത്തിൽ അഭ്യൂഹങ്ങൾ പ്രചരിച്ചിരുന്നു. ഇപ്പോൾ ആ വാർത്തകൾ സ്ഥിരീകരിച്ചിരിക്കുകയാണ് താരം.
തന്റെ കരിയറിലെ ഉയർച്ച താഴ്ചകളിലും സന്തോഷങ്ങളിലും ഒപ്പം നിന്ന പ്രേക്ഷകരോട് ഈ കാര്യം നേരിട്ട് പങ്കുവെക്കേണ്ടത് തന്റെ കടമയാണെന്ന് ജീവ കുറിപ്പിൽ വ്യക്തമാക്കി. തങ്ങളെ ഒരു ദമ്പതികളായി ഒരുപാട് പേർ സ്നേഹിച്ചിരുന്നുവെന്നും എന്നാൽ ഇനി മുതൽ ‘ഞങ്ങൾ’ എന്നതിന് പകരം വെറും ജീവയും അപർണയും മാത്രമായിരിക്കുമെന്നും അദ്ദേഹം കുറിച്ചു. എവിടെയോ എന്തോ പിഴച്ചുവെന്നും ഇത് ഇനി മുന്നോട്ട് പോകില്ലെന്ന യാഥാർത്ഥ്യം ഉൾക്കൊണ്ട് പരസ്പര സമ്മതത്തോടെ വഴിപിരിയുകയാണെന്നും ജീവ വ്യക്തമാക്കി.
ഈ തീരുമാനത്തിന് പിന്നിലെ കാരണം തികച്ചും വ്യക്തിപരമാണ്. തങ്ങൾ ഇതിനെ പക്വതയോടെ കൈകാര്യം ചെയ്തതുപോലെ ആരാധകരും ഈ സാഹചര്യത്തെ ഉൾക്കൊള്ളണമെന്നും, ഈയൊരു ഘട്ടത്തിൽ തങ്ങളുടെ സ്വകാര്യതയെ മാനിക്കണമെന്നും ജീവ അഭ്യർത്ഥിച്ചു. നടക്കുന്നതെല്ലാം നല്ലതിനാണെന്ന് വിശ്വസിക്കുന്നു എന്ന് പറഞ്ഞുകൊണ്ടാണ് താരം കുറിപ്പ് അവസാനിപ്പിക്കുന്നത്. പക്വതയോടെയും കാര്യ ഗൗരവത്തോടെയേയും കാര്യങ്ങൾ വിശദീകരിച്ച ജീവയുടെ കുറിപ്പിന് താഴെ നിരവധി ആരാധകരും സുഹൃത്തുക്കളുമാണ് ഇരുവർക്കും പിന്തുണയുമായി എത്തുന്നത്.
