മുംബൈ: വനിതാ പ്രീമിയർ ലീഗ് ക്രിക്കറ്റിൽ മുംബൈ ഇന്ത്യൻസിനെതിരെ ഡൽഹി ക്യാപ്പിറ്റൽസിന് അനായാസ ജയം. ടോസ് നേടി ബൗളിംഗ് തിരഞ്ഞെടുത്ത ഡൽഹിയുടെ കൃത്യതയാർന്ന ബൗളിംഗിനും ഫീൽഡിംഗിനും മുന്നിൽ കരുത്തുറ്റ മുംബൈ ബാറ്റിംഗ് നിരയ്ക്ക് 20 ഓവറിൽ 8 വിക്കറ്റ് നഷ്ടത്തിൽ 109 റൺസ് എടുക്കാനേ സാധിച്ചുള്ളൂ. മറുപടി ബാറ്റിംഗിൽ വെറും ഒൻപത് ഓവറിൽ ഒരു വിക്കറ്റ് നഷ്ടത്തിൽ ഡൽഹി ലക്ഷ്യം മറികടന്നു.
2 വീതം വിക്കറ്റുകൾ വീഴ്ത്തിയ മാരിസാനെ കാപ്പ്, ശിഖ പാണ്ഡെ, ജെസ് ജൊനാസൻ എന്നിവർ ചേർത്താണ് മുംബൈ ഇന്നിംഗ്സിനെ കടപുഴക്കിയത്. മുംബൈക്ക് വേണ്ടി പൂജ വസ്ത്രകാർ 26 റൺസും വോംഗും ക്യാപ്ടൻ ഹർമൻപ്രീത് കൗറും 23 റൺസ് വീതവും നേടി.
ചെറിയ ലക്ഷ്യത്തിലേക്ക് അനായാസം ബാറ്റ് വീശിയ ഡൽഹിക്ക് വേണ്ടി ആലീസ് കാപ്സി 17 പന്തിൽ 38 റൺസുമായും ക്യാപ്ടൻ മെഗ് ലാനിംഗ് 22 പന്തിൽ 32 റൺസുമായും പുറത്താകാതെ നിന്നു. ഓപ്പണർ ഷഫാലി വർമ 15 പന്തിൽ 33 റൺസെടുത്ത് പുറത്തായി.
Discussion about this post