കൊച്ചി: ആമയുടെ പുറത്ത് പണം വച്ചാൽ ഇരട്ടിക്കുമെന്ന് വിശ്വസിപ്പിച്ച് കാമുകിയുടെ 23 പവൻ സ്വർണം തട്ടിയെടുത്ത കേസിൽ കാമുകനും കൂട്ടാളിയും പിടിയിൽ. ഇടുക്കി ചുരുളിപതാൽ ആൽപ്പാറ മുഴയിൽ വീട്ടിൽ കിച്ചു എന്ന ബെന്നി(23) കൂട്ടാളിയായ രാജസ്ഥാൻ സ്വദേശി വിശാൽ മീണ(28) എന്നിവരാണ് പിടിയിലായത്.
എറണാകുളത്ത് ജോലി ചെയ്യുന്ന ഇടുക്കി സ്വദേശിനിയെ പണം ഇരട്ടിക്കുമെന്ന് വിശ്വസിപ്പിച്ച് 23 പവൻ തട്ടിയെടുക്കുകയായിരുന്നു. വിശാൽ മീണയ്ക്ക് പണം ഇരട്ടിപ്പിക്കാനുള്ള കഴിവ് ഉണ്ടെന്നും സ്വർണം നൽകിയാൽ ഇരട്ടിപ്പിച്ച് തരുമെന്നും വിശ്വസിപ്പിച്ചു.
തുടർന്ന് മട്ടാഞ്ചേരിയിൽ വച്ച് സ്വർണം കൈമാറിയ ശേഷം കാറിൽ എറണാകുളത്തേക്ക് വരുന്നതിനിടെ സിഗരറ്റ് വാങ്ങാൻ കിച്ചു കാർ നിർത്തി പുറത്തിറങ്ങി. ഒപ്പം യുവതിയും കടയിലേക്ക് പോയി. ഈ സമയം വിശാൽ സ്വർണവുമായി മുങ്ങി.
ഒട്ടും സമയം വൈകിക്കാതെ യുവതി നോർത്ത് പോലീസ് സ്റ്റേഷനിൽ പരാതി നൽകി. റെയിൽവേ സ്റ്റേഷനുകളിൽ നടത്തിയ പരിശോധനയിൽ ഷൊർണൂരിൽ വച്ച് തൊണ്ടിസഹിതം വിശാലിനെ പിടികൂടുകയായിരുന്നു. കിച്ചുവിന്റെ ഒത്താശയോടെയായിരുന്നു വിശാൽ പണം തട്ടിയത്. എന്നാൽ കിച്ചുവിനെ കബളിപ്പിച്ച് സ്വർണം തട്ടിയെടുത്ത ശേഷം മുങ്ങാനായിരുന്നു വിശാലിന്റെ പദ്ധതി.
Discussion about this post