രാജാവ് നഗ്നനാണെന്ന് രാജകുടുംബാംഗങ്ങൾ എന്നാണ് തിരിച്ചറിയുക; രാഹുലിനെ പരോക്ഷമായി പരിഹസിച്ചും കിരൺ കുമാർ റെഡ്ഡിയെ ബിജെപിയിലേക്ക് സ്വാഗതം ചെയ്തും അനിൽ കെ ആന്റണി

ന്യൂഡൽഹി: ആന്ധ്രാപ്രദേശ് മുൻ മുഖ്യമന്ത്രിയും മുതിർന്ന കോൺഗ്രസ് നേതാവുമായ കിരൺ കുമാർ റെഡ്ഡി ബിജെപി അംഗത്വം സ്വീകരിച്ചതിൽ പ്രതികരണവുമായി അനിൽ ആന്റണി. ബിജെപി അംഗത്വം എടുത്ത കിരൺ കുമാറിനെ അഭിനന്ദിച്ച അനിൽ, അദ്ദേഹത്തെ പാർട്ടിയിലേക്ക് സ്വാഗതം ചെയ്തു. മുൻവിധിയും പക്ഷപാതവുമില്ലാതെ ഇന്ത്യയുടെ  ദേശീയ താൽപ്പര്യങ്ങൾക്കും പൊതുതാൽപ്പര്യങ്ങൾക്കും വേണ്ടി പ്രവർത്തിക്കുന്ന സംഘടനയിൽ നിങ്ങളും ചേർന്നതിൽ സന്തോഷമുണ്ടെന്ന് അനിൽ കെ ആന്റണി കൂട്ടിച്ചേർത്തു. രാജാവ് നഗ്നനാണെന്ന് ഇനിയെന്നാണ് രാജകുടുംബാംഗങ്ങൾ തിരിച്ചറിയുകയെന്ന് അദ്ദേഹം രാഹുലിനെ പരോക്ഷമായി പരിഹസിച്ചു.

Welcome Kiran Kumar Reddy ji to the @BJP4India ! Glad you have also joined the organization that is working for India’s core national interests and for public interests without prejudice and bias.
How many more should say that the emperor has no clothes before the grand royals… https://t.co/ZUKzJ9mPJU

— Anil K Antony (Modiyude Kudumbam) (@anilkantony) April 7, 2023

ഇന്ന് രാവിലെയാണ് കിരൺ കുമാർ റെഡ്ഡി ബിജെപിയിൽ അംഗത്വമെടുത്തത്. പാർട്ടിയുടെ ഭാഗമാകാൻ കഴിഞ്ഞതിൽ അതിയായ സന്തോഷമുണ്ടെന്ന് അദ്ദേഹം പറഞ്ഞു.കേന്ദ്ര ആഭ്യന്തര മന്ത്രി അമിത് ഷാ, ബിജെപി ദേശീയ അദ്ധ്യക്ഷൻ ജെ.പി നദ്ദ എന്നിവർ ചടങ്ങിൽ പങ്കെടുത്തിരുന്നു.

കോൺഗ്രസ് വിട്ട് പോകേണ്ടിവരുമെന്ന് ഒരിക്കൽ പോലും താൻ ചിന്തിച്ചിരുന്നില്ലെന്ന് കിരൺ കുമാർ റെഡ്ഡി പറഞ്ഞു. എന്നാൽ ആ അവസ്ഥ തനിക്ക് ഉണ്ടായി. ഹൈക്കമാൻഡിന്റെ തെറ്റായ തീരുമാനങ്ങൾ മൂലം കോൺഗ്രസ് എല്ലാ സംസ്ഥാനങ്ങളിലും നശിച്ചുകൊണ്ടിരിക്കുകയാണ്. അവർ ജനങ്ങളുമായി ഇടപഴകുന്നില്ല, അവരുടെ ആവശ്യങ്ങൾ അറിയുന്നില്ല. ജനങ്ങളുടെ അഭിപ്രായങ്ങൾക്ക് വില കൽപ്പിക്കുന്നില്ല. ഇത് ഒരു സംസ്ഥാനത്തെ മാത്രം കാര്യമല്ല. എല്ലാ സംസ്ഥാനങ്ങളിലും ഇത് തന്നെയാണ് അവസ്ഥയെന്നും അദ്ദേഹം കൂട്ടിച്ചേർത്തു.

ഇന്നലെ ബിജെപി സ്ഥാപന ദിനത്തിലാണ് മുതിർന്ന കോൺഗ്രസ് നേതാവ് എകെ ആന്റണിയുടെ മകൻ അനിൽ കെ ആന്റണി ബിജെപിയിൽ ചേർന്നത്. കേന്ദ്രമന്ത്രി പിയൂഷ് ഗോയിലിൽ നിന്നായിരുന്നു അദ്ദേഹം അംഗത്വം സ്വീകരിച്ചത്.