കേന്ദ്രസർക്കാരിന്റെ വാണിജ്യ വ്യവസായ വകുപ്പിനു കീഴിലുള്ള ട്രേഡ്മാർക്ക്സ് രജിസ്ട്രിയിലാണ് ട്രേഡ്മാർക്കിനായുളള അപേക്ഷ സമർപ്പിക്കേണ്ടത്. 45 വ്യത്യസ്ത വിഭാഗങ്ങളിലായാണ് റജിസ്ട്രേഷൻ അനുവദിക്കുക
ഒരു സംരംഭകൻ സംബന്ധിച്ചിടത്തോളം ഏറ്റവും വലിയ സമ്പത്താണ് സ്വന്തം ബ്രാൻഡിന്റെ വളർച്ച. ബിസിനസിനെ ഉപഭോക്താവുമായി ബന്ധിപ്പിക്കുന്ന കണ്ണിയാണ് ബ്രാൻഡ്.അതിനാൽ ബ്രാൻഡിന്റെ സംരക്ഷണം ഒരു സംരംഭകന്റെ പ്രധാന ചുമതലയാണ്. ട്രേഡ്മാർക്ക് ഉപയോഗിച്ചാണ് ബ്രാൻഡിന്റെ സംരക്ഷണം ഉറപ്പുവരുത്തുക. ബ്രാൻഡ് നെയിം ലോഗോ എന്നിവ മറ്റാരും അനുകരിക്കുകയോ കൈക്കലാക്കുകയോ ചെയ്യാതിരിക്കാനാണ് സർക്കാർ സംവിധാനം വഴി അതു ട്രേഡ്മാർക്കായി രജിസ്റ്റർ ചെയ്യുന്നത്.
എന്താണ് ട്രേഡ്മാർക്ക് രജിസ്ട്രേഷൻ ?
ഒരു വ്യക്തി ഒരു ബിസിനസ് തുടങ്ങി ഒരു പേരും ലോഗോയും തെരെഞ്ഞെടുത്തു.എന്നാൽ കുറച്ചു കഴിയുമ്പോൾ മറ്റൊരാൾ ആ പേരോ ലോഗോയോ ഉപയോഗിച്ച് മറ്റൊരു സ്ഥാപനം തുടങ്ങിയാലോ? അത്തരം ഒരു അവസ്ഥ ഒഴിവാക്കുക എന്നതാണ് ട്രേഡ്മാർക്ക് രജിസ്ട്രേഷൻ കൊണ്ടുദ്ദേശിക്കുന്നത്. ബ്രാൻഡിന്റെ പേരോ ചിഹ്നമോ മറ്റാരെങ്കിലും കൈക്കലാക്കുകയോ ദുരുപയോഗപ്പെടുത്തുകയോ ചെയ്താൽ, നിങ്ങൾക്കുണ്ടാവുന്ന നഷ്ടം ഊഹിക്കാവുന്നതിലും അപ്പുറമായിരിക്കും. ട്രേഡ്മാർക്ക് രജിസ്ട്രേഷൻ ചെയ്താൽ പിന്നെ ഇത്തരത്തിൽ ബ്രാൻഡോ ലോഗോയോ ആരെങ്കിലും ദുരുപയോഗം ചെയ്താൽ ചോദ്യം ചെയ്യാനുള്ള അവസരം നിയമപരമായി ലഭിക്കും.
ട്രേഡ്മാർക്ക് എങ്ങനെ രജിസ്റ്റർ ചെയ്യാം?
കേന്ദ്രസർക്കാരിന്റെ വാണിജ്യ വ്യവസായ വകുപ്പിനു കീഴിലുള്ള ട്രേഡ്മാർക്ക്സ് രജിസ്ട്രിയിലാണ് ട്രേഡ്മാർക്കിനായുളള അപേക്ഷ സമർപ്പിക്കേണ്ടത്. 45 വ്യത്യസ്ത വിഭാഗങ്ങളിലായാണ് റജിസ്ട്രേഷൻ അനുവദിക്കുക. ആദ്യത്തെ 34 എണ്ണം പലതരം ചരക്കുകൾ ഉൾപ്പെടുന്ന വിഭാഗങ്ങളാണ്. പിന്നീടുള്ള 11 എണ്ണം വിവിധ സേവനങ്ങൾ ഉൾപ്പെടുന്ന വിഭാഗവും.ഇതിൽ നിങ്ങളുടെ ബ്രാൻഡ് ഏത് വിഭാഗത്തിലാണെന്ന് തിട്ടപ്പെടുത്തി, ആ വിഭാഗത്തിലാണ് അപേക്ഷ സമർപ്പിക്കേണ്ടത്. ചിലപ്പോൾ ഒന്നിൽ കൂടുതൽ വിഭാഗങ്ങളിലായി വ്യത്യസ്ത അപേക്ഷകളും നൽകേണ്ടി വരാം. ഇതെല്ലാം ഓൺലൈനായി സമർപ്പിക്കാം. എന്നാൽ ഫീസടച്ച് അപേക്ഷിച്ചാൽ ഉടനെ അനുവദിച്ചു കിട്ടുന്ന ഒന്നല്ല ട്രേഡ്മാർക്ക് രജിസ്ട്രേഷൻ.
ലക്ഷക്കണക്കിന് ട്രേഡ്മാർക്കുകൾ അടങ്ങിയ രജിസ്ട്രിയുടെ ഡേറ്റാബേസിൽ നിങ്ങളുടെ ബ്രാൻഡിന്റെ പേരോ ചിഹ്നമോ, അവയോട് സാമ്യമുള്ളതോ നിലവിലില്ല എന്ന് ആദ്യം ഉറപ്പു വരുത്തുക എന്നത് വലിയ ചുമതലയാണ്. ഇത്തരത്തിൽ മറ്റൊരു സ്ഥാപനം നിലവിലുണ്ടെങ്കിൽ അപേക്ഷ തള്ളിപോകാം. രജിസ്ട്രിയുടെ ഭാഗത്ത് നിന്നു തടസ്സങ്ങൾ ഇല്ലാതിരിക്കുകയോ തടസ്സങ്ങൾ നീങ്ങുകയോ ചെയ്താൽ നിങ്ങളുടെ ട്രേഡ്മാർക്ക് എല്ലാവർക്കും ഓൺലൈനായി പരിശോധിക്കാവുന്ന ഒരു ജേണലിൽ പ്രസിദ്ധീകരിക്കപ്പെടും. നാലുമാസങ്ങൾക്കുള്ളിൽ ആരും എതിർപ്പുമായി വന്നില്ലെങ്കിൽ ട്രേഡ്മാർക്ക് റജിസ്റ്റർ ചെയ്യപ്പെടുന്നതാണ്.
