ഒരു വിഭാഗം ആളുകളെ സംബന്ധിച്ചിടത്തോളം അക്ഷയതൃതീയ എന്നത് സ്വർണം വാങ്ങി സൂക്ഷിക്കാൻ ഏറ്റവും ഉചിതമായ ദിനമാണ്. എന്നാൽ ഇത് മാത്രമാണോ അക്ഷയതൃതീയ എന്ന ഈ ദിനത്തിന്റെ പ്രത്യേകത? ഒരിക്കലുമല്ല. അതിനുമപ്പുറം അക്ഷയതൃതീയ എന്ന ദിനത്തിന് ഹൈന്ദവ ആചാരങ്ങളും വിശ്വാസങ്ങളുമായി കിടപിടഞ്ഞു കിടക്കുന്ന ഐതിഹ്യവും വിശ്വാസവുമുണ്ട്. അതിനാൽ തന്നെ ഈ ദിനം ആചരിക്കും മുൻപ് ഐതിഹ്യം അറിഞ്ഞിരിക്കുന്നത് ഉചിതമാകും.
വൈശാഖമാസത്തിലെ വിശേഷദിവസങ്ങളില് ഏറെ പ്രാധാന്യം നിറഞ്ഞ ഒന്നാണ് “അക്ഷയതൃതീയ”. വൈഷ്ണവ ആരാധനയുമായി ബന്ധപ്പെട്ട് ഏറെ നിർണായകമാണ് വൈശാഖമാസം. വൈശാഖമാസത്തിലെ ശുക്ലപക്ഷത്തിലെ മൂന്നാമത്തെ തിഥിയാണു “അക്ഷയ തൃതീയ” എന്ന് അറിയപ്പെടുന്നത്. സ്വർണം വാങ്ങി സൂക്ഷിക്കുക എന്നത് മാത്രമല്ല ഈ ദിനത്തിന്റെ പ്രത്യേകത. ഇന്നേ ദിവസം ചെയ്യുന്ന സദ്കർമ്മങ്ങളുടെ ഫലം ക്ഷയിക്കില്ല എന്നാണ് വിശ്വാസം. അത് പോലെ സ്വന്തമാക്കുന്നതൊന്നും കൈവിട്ട് പോക്കുള്ള എന്നും. ഈ വിശ്വാസത്തിന്റെ ഭാഗമായി ആളുകൾ സ്വർണം പോലുള്ള വിലയേറിയ വസ്തുക്കൾ സ്വന്തമാക്കാറുണ്ടെന്നത് മറ്റൊരു വസ്തുത.
അക്ഷയ തൃതീയ, യുഗങ്ങളുടെ തുടക്കമായ കൃതയുഗത്തിലെ അഥവാ സത്യയുഗത്തിലെ ആദ്യ ദിവസമാണെന്ന് പറയപ്പെടുന്നു. പുരുഷാര്ഥങ്ങളായ ധര്മം, അര്ഥം, കാമം, മോക്ഷം തുടങ്ങിയ നിഷ്ഠയൊടെ അനുഷ്ഠിച്ചവരായിരുന്നു ആ യുഗത്തിൽ ഉണ്ടായിരുന്നത് എന്നാണ് വിശ്വാസം. അതിനാല് തന്നെ അന്ന് ധര്മ്മം അതിന്റെ എല്ലാ പ്രഭാവത്തൊടും കൂടി ജ്വലിച്ചു നിന്നിരുന്നതായി പറയപ്പെടുന്നു. ഈ യുഗത്തിന്റെ ഓര്മ്മ പുതുക്കല് കൂടിയാണ് അക്ഷയ തൃതീയ.“അക്ഷതം” കൊണ്ട്(ഉണക്കലരിയും നെല്ലും) ഭഗവാന് വിഷ്ണുവിനെ പൂജിക്കുന്ന ദിനമായതിനാലാണ് ഈ തിഥിയെ അക്ഷയ തൃതീയ എന്നു പറയുന്നത് എന്നും ഒരു വിഭാഗം വിശ്വസിക്കുന്നു.
പ്രകൃതിക്കും ഏറെ പ്രത്യേകതകളുള്ള ദിനമാണ് അക്ഷയതൃതീയ. ഈ ദിവസം സൂര്യന് അതിന്റെ പൂര്ണ പ്രഭയില് നില്ക്കുന്നു. ജ്യോതിഷപ്രകാരം ചന്ദ്രനും അതിന്റെ ഏറ്റവും ഉത്തമമായ സ്ഥാനത്താണ് ഈ ദിവസം നില്ക്കുന്നത്. ഈ ദിനം ചെയ്യുന്ന ദാന കര്മ്മങ്ങളുടെ ഫലം ഇരട്ടിയായിരിക്കുമെന്നാണ് വിശ്വാസം. അക്ഷയ ത്രിതീയ ദിനത്തിൽ ഉപവാസമനുഷ്ഠിച്ച് മഹാവിഷ്ണു സേവ നടത്തുന്നത് പുണ്യകരമാണ് എന്ന് വിശ്വസിക്കുന്നു. അങ്ങനെ ചെയ്യുന്നവർക്ക് രാജസൂയയാഗം ചെയ്ത ഫലവും അന്ത്യത്തില് വിഷ്ണു പ്രാപ്തിയുമുണ്ടാകും എന്നാണ് പറയപ്പെടുന്നത്.
അക്ഷയ തൃതീയയുമായി ബന്ധപ്പെട്ട മറ്റൊരു കഥ പാണ്ഡവർക്ക് അക്ഷയപാത്രം ലഭിച്ചതുമായി ബന്ധപ്പെട്ടതാണ്. സൂര്യന് അക്ഷയപാത്രം സമ്മാനിച്ചത് അക്ഷയ തൃതീയ ദിനത്തിലാണെന്നും അതിനാലാണ് ആ പാത്രത്തിൽ നിന്നും ക്ഷയമില്ലാതെ അന്നം ലഭിക്കുന്നതെന്നും പറയപ്പെടുന്നു.പാഞ്ചാലിയുടെ ഭക്ഷണം കഴിയുന്നതുവരെ ദിവസവും അവർ ആഗ്രഹിക്കുന്ന ഭക്ഷണസാധനങ്ങൾ അതിൽനിന്നും ലഭിച്ചിരുന്നു എന്ന് ഐതിഹ്യം പറയുന്നു.
Discussion about this post