പരസ്യദാതാക്കള്‍ക്കുള്ള മൈക്രോസോഫ്റ്റിന്റെ സോഷ്യല്‍മീഡിയ പ്ലാനിംഗ്, ഷെഡ്യൂളിംഗ് ടൂളുകളില്‍ ഇനി ട്വിറ്റര്‍ ഉണ്ടാകില്ല. ഇലോണ്‍ മസ്‌കിന്റെ ഉടമസ്ഥതയിലുള്ള സോഷ്യല്‍ മീഡിയ പ്ലാറ്റ്‌ഫോമായ ട്വിറ്റര്‍ അവരുടെ പ്രോഗ്രാമിംഗ് ഇന്റെര്‍ഫേസ് ആക്‌സസ് ചെയ്യുന്നതിന് തുക ഈടാക്കാന്‍ തുടങ്ങിയതോടെയാണ് പരസ്യ പ്ലാറ്റ്‌ഫോമില്‍ നിന്ന് ട്വിറ്ററിനെ ഒഴിവാക്കാന്‍ മൈക്രോസോഫ്റ്റ് തീരുമാനിച്ചത്. അതേസമയം മൈക്രോസോഫ്റ്റ് നിയമവിരുദ്ധമായി ട്വിറ്റര്‍ ഡാറ്റ ഉപയോഗിക്കുകയാണെന്നും ഇതിനെതിരെ കേസ് കൊടുക്കുമെന്നും മസ്‌ക് പ്രതികരിച്ചു. കഴിഞ്ഞ വര്‍ഷം ട്വിറ്ററിനെ ഏറ്റെടുത്ത മസ്‌ക് ട്വിറ്റര്‍ ഡാറ്റ ഉപയോഗിക്കുന്ന ബിസിനസുകളില്‍ നിന്നും തുക ഈടാക്കുന്ന തരത്തില്‍ കമ്പനി നയങ്ങളില്‍ മാറ്റം വരുത്തിയിരുന്നു.
പരസ്യദാതാക്കള്‍ക്ക് ഫേസ്ബുക്ക്, ഇന്‍സ്റ്റഗ്രാം, ലിങ്ക്ഡ്ഇന്‍ അടക്കമുള്ള സോഷ്യല്‍മീഡിയ പ്ലാറ്റ്‌ഫോമുകളിലെ പരസ്യ ക്യാംപെയ്‌നുകള്‍ മാനേജ് ചെയ്യാന്‍ സഹായിക്കുന്ന മൈക്രോസോഫ്റ്റിന്റെ സംവിധാനമാണ് സ്മാര്‍ട്ട് ക്യാംപെയിന്‍സ് സേവനം. എന്നാല്‍ ഏപ്രില്‍ 25 മുതല്‍ ഇതിലൂടെ ട്വിറ്റര്‍ പരസ്യ ക്യാംപെയ്‌നുകള്‍ മാനേജ് ചെയ്യാന്‍ കഴിയില്ലെന്നാണ് മൈക്രോസോഫ്റ്റ് വ്യക്തമാക്കിയിരിക്കുന്നത്. അതായത് ഈ പ്ലാറ്റ്‌ഫോമിലൂടെ ട്വീറ്റുകളോ, ഡ്രാഫ്റ്റുകളോ ചെയ്യാനും മുമ്പ് പോസ്റ്റ് ചെയ്ത ട്വീറ്റുകളും അതിലെ എന്‍ഗേജ്‌മെന്റും കാണാനും ഇനി സാധിക്കില്ല.
ഇലോണ്‍ മസ്‌ക് സഹസ്ഥാപകനായിരുന്ന ഓപ്പണ്‍എഐ റിസര്‍ച്ച് ലാബിലെ മുഖ്യ നിക്ഷേപകരാണ് മൈക്രോസോഫ്റ്റ്. 2018ലാണ് മസ്‌കും സംഘവും ഓപ്പണ്‍എഐ വിടുന്നത്. ഇപ്പോള്‍ സ്വന്തമായൊരു എഐ ലാബിന് രൂപം നല്‍കാനുള്ള പദ്ധതിയിലാണ് മസ്‌ക്.
അതേസമയം മസ്‌കിന്റെ ഭീഷണിയില്‍ മൈക്രോസോഫ്റ്റ് ഇതുവരെ പ്രതികരിച്ചിട്ടില്ല.
Discussion about this post