എറണാകുളം: പള്ളിയിൽ കയറി കുർബാനയുടെ ഭാഗമായ തിരുവോസ്തി സ്വീകരിച്ച മലപ്പുറം സ്വദേശികൾ പിടിയിൽ. മലപ്പുറം സ്വദേശികളായ നാല് പേരെയാണ് വിശ്വാസികൾ പിടികൂടി പോലീസിന് കൈമാറിയത്. എറണാകുളം സെന്റ് തെരേസാസ് ആശ്രമ ദേവാലയത്തിലായിരുന്നു സംഭവം.
കുർബാനയ്ക്ക് ശേഷം തിരുവോസ്തി സ്വീകരിച്ച ഇവർ പകുതി കഴിച്ച ശേഷം പോക്കറ്റിൽ ഇടുകയായിരുന്നു. ഇത് വിശ്വാസികളിൽ ചിലരുടെ ശ്രദ്ധയിൽപ്പെട്ടു. ഇതോടെ ഇവരെ പിടികൂടി ചോദ്യം ചെയ്തപ്പോഴാണ് അന്യമതസ്ഥരാണെന്ന് വ്യക്തമായത്. തുടർന്ന് വിവരം പോലീസിനെ അറിയിക്കുകയായിരുന്നു.
സെൻട്രൽ പോലീസ് എത്തി ഇവരെ ചോദ്യം ചെയ്തു. പള്ളിയ്ക്കുള്ളിൽ നടക്കുന്നത് എന്താണെന്ന് അറിയാനുള്ള കൗതുകത്തിലാണ് അകത്തേക്ക് പ്രവേശിച്ചത് എന്നാണ് ചെറുപ്പക്കാർ പോലീസിനോട് പറഞ്ഞത്. എന്നാൽ ഇത് പോലീസ് പൂർണമായി വിശ്വസിച്ചിട്ടില്ല. സംഭവത്തിൽ പോലീസ് വിശദമായ അന്വേഷണം ആരംഭിച്ചു. ഇവരുടെ വരവിന് പിന്നിൽ ദുരുദ്ദേശം വല്ലതും ഉണ്ടായിരുന്നോ എന്നാണ് പ്രധാനമായും പരിശോധിക്കുന്നത്.
നിലവിൽ ഇവർക്കെതിരെ പരാതി ലഭിച്ചിട്ടില്ല. അതിനാൽ പോലീസ് കേസ് രജിസ്റ്റർ ചെയ്തിട്ടില്ല. എങ്കിലും വ്യക്തതവരുന്നതുവരെ ഇവരെ കസ്റ്റഡിയിൽതന്നെ വയ്ക്കാനാണ് പോലീസിന്റെ തീരുമാനം. ഇവരുടെ വിവരങ്ങൾ മലപ്പുറം പോലീസിന് കൈമാറിയിട്ടുണ്ട്.
