പാകിസ്താനിലെ ബലൂചിസ്ഥാൻ പ്രവിശ്യാ തലസ്ഥാനമായ ക്വറ്റയ്ക്ക് സമീപം സൈനിക പരിശീലന വിമാനം തകർന്നു വീണ് രണ്ട് പൈലറ്റുമാർ കൊല്ലപ്പെട്ടു. തിങ്കളാഴ്ച ഉച്ചയോടെ ക്വറ്റയിലെ നവാ കില്ലി പ്രദേശത്ത് വെച്ചാണ് പാകിസ്താൻ ആർമി ഏവിയേഷന്റെ ‘മുഷ്ഷാക്’ എന്ന പരിശീലന വിമാനം അപകടത്തിൽപ്പെട്ടത്. പരിശീലകനായ മേജർ ഹസ്നൈൻ ഷെഹ്സാദ് ഹുമയൂൺ, ട്രെയിനി പൈലറ്റായ ക്യാപ്റ്റൻ അബ്ദുൾ സമദ് എന്നിവരാണ് അപകടത്തിൽ ജീവൻ വെടിഞ്ഞതെന്ന് പാകിസ്താൻ സൈന്യത്തിന്റെ മാധ്യമ വിഭാഗമായ ഇന്റർ സർവീസസ് പബ്ലിക് റിലേഷൻസ് അറിയിച്ചു.
സാങ്കേതിക തകരാറാണ് വിമാനം തകർന്നു വീഴാൻ കാരണമെന്ന് പ്രാഥമിക വിവരങ്ങൾ വ്യക്തമാക്കുന്നു. പതിവ് പരിശീലന പറക്കലിനിടെ പെട്ടെന്നുണ്ടായ യന്ത്രതകരാറിനെ തുടർന്ന് വിമാനത്തിന്റെ നിയന്ത്രണം നഷ്ടമാവുകയും നിലംപതിക്കുകയുമായിരുന്നു. അപകടത്തിൽപ്പെട്ട പൈലറ്റുമാരുടെ വേർപാടിൽ പാകിസ്താൻ പ്രസിഡന്റ്, പ്രധാനമന്ത്രി, ആഭ്യന്തര മന്ത്രി എന്നിവർ കടുത്ത ദുഃഖവും അനുശോചനവും രേഖപ്പെടുത്തി.
പാകിസ്താൻ സൈനിക ഏവിയേഷൻ വിഭാഗത്തിൽ അടുത്തിടെ ഉണ്ടാകുന്ന തുടർച്ചയായ അപകടങ്ങളുടെ ഭാഗമായാണ് ഈ ദുരന്തവും റിപ്പോർട്ട് ചെയ്തിരിക്കുന്നത്. കഴിഞ്ഞ ജൂണിൽ മുസാഫറാബാദിന് സമീപം സൈന്യത്തിന്റെ എം.ഐ-17 ഹെലികോപ്റ്റർ തകർന്നു വീണ് വിമാനത്തിലുണ്ടായിരുന്ന എല്ലാവരും കൊല്ലപ്പെട്ടിരുന്നു. അതേമാസം തന്നെ മർദാനിൽ വ്യോമസേനയുടെ മറ്റൊരു പരിശീലന വിമാനവും തകർന്ന് രണ്ട് പൈലറ്റുമാർ കൊല്ലപ്പെട്ടിരുന്നു.
