തിരുവനന്തപുരം: വന്ദേഭാരത് ബംഗളൂരുവിലേക്ക് നീട്ടുന്ന കാര്യം പരിഗണനയിലാണെന്ന് കേന്ദ്ര റെയിൽവേ മന്ത്രി അശ്വിനി വൈഷ്ണവ്. സ്ലീപ്പർ ട്രെയിനുകൾ ഓടിക്കാനാകുന്ന റൂട്ടാണത്. വന്ദേ മെട്രോ വരുമ്പോൾ തിരുവനന്തപുരം – കൊച്ചി റൂട്ടിന് മുന്തിയ പരിഗണന നൽകുമെന്നും അദ്ദേഹം പറഞ്ഞു.
സിൽവർ ലൈൻ സംബന്ധിച്ച് കേന്ദ്ര സർക്കാരിന് വ്യക്തമായ നിലപാടുണ്ടെന്നും മന്ത്രി വ്യക്തമാക്കി. പാരിസ്ഥിതികവും സാങ്കേതികപരമായ തടസ്സങ്ങൾ പരിഹരിച്ചാൽ മാത്രമേ സിൽവർലൈൻ പദ്ധതിയിൽ തീരുമാനം കൈക്കൊള്ളാനാകൂ. ഡിപിആർ പരിശോധിക്കുമ്പോൾ സാങ്കേതികവും പാരിസ്ഥിതികവുമായ പ്രശ്നങ്ങൾ പദ്ധതിക്കുണ്ടോയെന്ന് കണ്ടെത്താനാകും. ഡിപിആർ ഇപ്പോഴും പരിശോധനയിലാണെന്നും അന്തിമ തീരുമാനമെടുക്കുമ്പോൾ സംസ്ഥാന സർക്കാരുമായി ആലോചിക്കുമെന്നും മന്ത്രി പറഞ്ഞു.
രാജ്യത്ത് വന്ദേഭാരത് മെട്രോ ട്രെയിനുകൾ അടുത്ത വർഷമാദ്യം പരീക്ഷണ ഓട്ടം നടത്തുമെന്നും അദ്ദേഹം കൂട്ടിച്ചേർത്തു. രാജ്യത്ത് മൂന്ന് തരത്തിലുള്ള വന്ദേഭാരത് സർവീസുകളാണ് നടപ്പാക്കുന്നത്. ചെയർകാർ സർവീസ്, സ്ലീപ്പർ സർവീസ്, വന്ദേഭാരത് മെട്രോ സർവീസ്. ഇതിൽ കുറഞ്ഞ ദൂരങ്ങളെ തമ്മിൽ ബന്ധിപ്പിക്കുന്ന തരത്തിൽ വന്ദേ ഭാരത് മെട്രൊ ഉടൻ യാഥാർത്ഥ്യമാകുമെന്നും ഇതിന്റെ രൂപകല്പനയും നിർമാണ പ്രവർത്തനങ്ങളും പുരോഗമിക്കുകയാണെന്നും അശ്വിനി വൈഷ്ണവ് വ്യക്തമാക്കി.
Discussion about this post