എറണാകുളം: സർവ്വകാല റെക്കോർഡിൽ എത്തിയതിന് പിന്നാലെ തിരിച്ചിറങ്ങി സംസ്ഥാനത്തെ സ്വർണ വില. ഇന്ന് ഗ്രാമിന് 70 രൂപ കുറഞ്ഞു. ഇതോടെ സ്വർണവില വീണ്ടും 45,000 ത്തിലേക്ക് താഴ്ന്നു.
നിലവിൽ 45,200 ആണ് സംസ്ഥാനത്തെ സ്വർണവില. പവന് 560 രൂപയുടെ കുറവാണ് ഉണ്ടായിരിക്കുന്നത്. മൂന്ന് ദിവസത്തെ തുടർച്ചയായ വർദ്ധനവിൽ സ്വർണവില 46,000 ആയി ഉയർന്നിരുന്നു. ഇവിടെ നിന്നാണ് വിലയിൽ കുറവുണ്ടായിരിക്കുന്നത്. നിലവിൽ ഗ്രാമിന് 5650 രൂപ എന്ന നിലയിലാണ് വ്യാപാരം പുരോഗമിക്കുന്നത്.
ഈ മാസം ആദ്യ ദിനം മുതൽ സ്വർണവിലയിൽ വർദ്ധനവ് അനുഭവപ്പെടുന്നുണ്ട്. ഈ മാസം ഒന്നാം തിയതി 44,560 ആയിരുന്നു സ്വർണവില. രണ്ടാം തിയതിയും ഈ വില തുടർന്നെങ്കിലും പിന്നീടുള്ള ദിവസങ്ങളിൽ വിലയിൽ വലിയ വർദ്ധനവ് ഉണ്ടായി.
അതേസമയം ഇന്ന് വില കുറഞ്ഞുവെങ്കിലും വരും ദിവസങ്ങളിൽ വില വർദ്ധനവ് ഉണ്ടാകുമെന്നാണ് സൂചനകൾ. അതുകൊണ്ടുതന്നെ ഇന്നത്തെ വില ഉപഭോക്താക്കൾ പരമാവധി പ്രയോജനപ്പെടുത്തുന്നുണ്ട്. രാവിലെ മുതൽ വലിയ തിരക്കാണ് കടകളിൽ അനുഭവപ്പെടുന്നത്. സുരക്ഷിത നിക്ഷേപമെന്ന നിലയിൽ ആളുകൾ സ്വർണത്തിൽ നിക്ഷേപം വർദ്ധിപ്പിക്കുന്നതാണ് സ്വർണ വിലയിലെ വർദ്ധനവിനും കാരണമാകുന്നതെന്നാണ് സാമ്പത്തിക വിദഗ്ധർ ചൂണ്ടിക്കാട്ടുന്നത്.
Discussion about this post