ന്യൂയോര്ക്ക്: റോഹിങ്ക്യ മുസ്ലീങ്ങളെ രാജ്യത്തെ പൗരന്മാരായി അംഗീകരിയ്ക്കണമെന്നും ഇതിനായി പൗരത്വ ചട്ടങ്ങള് ഭേദഗതി ചെയ്യണമെന്നും ഐക്യരാഷ്ട്രസഭ മ്യാന്മര് സര്ക്കാരിനോട് ആവശ്യപ്പെട്ടു. യു.എന് മനുഷ്യാവകാശ സമിതിയാണ് കരട് പ്രമേയത്തില് മ്യാന്മര് സര്ക്കാറിനെതിരെ വിമര്ശനമുന്നയിച്ചത്.
നൂറ്റാണ്ടുകളായി മ്യാന്മറില് ജീവിയ്ക്കുന്ന റോഹിങ്ക്യ വംശജരെ പൗരന്മാരായി അംഗീകരിയ്ക്കണം.. മ്യാന്മറിലെ റാഖൈന് പ്രവിശ്യയില് ഒതുക്കപ്പെട്ട റോഹിങ്ക്യകള് നേരിടുന്ന കടുത്ത മനുഷ്യാവകാശ ലംഘനങ്ങളിലും അവരുടെ ദുരിത ജീവിതത്തിലും യു.എന് ആശങ്ക രേഖപ്പെടുത്തി. റോഹിങ്ക്യകളടക്കമുള്ള എല്ലാ ജനവിഭാഗങ്ങളുടേയും സ്വാതന്ത്ര്യവും അവകാശങ്ങളും സംരക്ഷിയ്ക്കാന് മ്യാന്മര് സര്ക്കാര് തയ്യാറാകണമന്നും യു.എന് പ്രമേയം ആവശ്യപ്പെടുന്നു. അടുത്ത മാസം ഐക്യരാഷ്ട്ര പൊതുസഭയില് പ്രമേം ചര്ച്ചയ്ക്ക് വച്ച് വോട്ടിനിടും.
അതേ സമയം ഐക്യരാഷ്ട്രസഭയിലെ മ്യാന്മര് പ്രതിനിധി ഉ ക്യോവ് പ്രമേയത്തിനെതിരെ വിമര്ശനവുമായി രംഗത്തെത്തി. ഏതെങ്കിലും രാജ്യങ്ങള്ക്കെതിരെ ഇത്തരത്തില് ഒറ്റയ്ക് പ്രമേയം അവതരിപ്പിയ്ക്കുന്നതിനേയും റോഹിങ്ക്യ എന്ന പേരിനേയും മ്യാന്മര് പ്രതിനിധി എതിര്ത്തു. ഇത്തരത്തില് ഒരു വംശമോ ജനവിഭാഗമോ മ്യാന്മറിലില്ലെന്ന് ഉക്യോവ് പറഞ്ഞു.
മ്യാന്മറില് 1982ല് പൗരത്വ ചട്ടവുമായി ബന്ധപ്പെട്ട് അംഗീകരിച്ച 135 വംശീയ ഗ്രൂപ്പുകളുടെ പട്ടികയില് റോഹിങ്ക്യകളില്ല. പരിമിതമായ അവകാശങ്ങള് മാത്രമാണ് ഇവര്ക്കുള്ളത്. നൂറ് കണക്കിന് റോഹിങ്ക്യകളാണ് ബുദ്ധിസ്റ്റ് തീവ്രവാദി ഗ്രൂപ്പുകളുടെ ആക്രമണത്തില് മ്യാന്മറില് കൊല ചെയ്യപ്പെട്ടത്. നിരവധി പേര്ക്ക് പലായനം ചെയ്യേണ്ടി വന്നു. ഒന്നര ലക്ഷത്തോളം പേര് അഭയാര്ത്ഥി ക്യാമ്പുകളില് തുടരുകയാണ്.
മ്യാന്മറില് ഓങ് സാന് സൂ ചിയുടെ നേതൃത്വത്തില് എന്.എല്.ഡി അധികാരത്തിലെത്തുന്നത് തങ്ങളുടെ അവസ്ഥയില് എന്തെങ്കിലും മാറ്റം വരുത്തുമെന്ന പ്രതീക്ഷ റോഹിങ്ക്യകള്ക്കുണ്ട്. അതേ സമയം റോഹിങ്ക്യകള് നേരിടുന്ന മനുഷ്യാവകാശ ലംഘനത്തില് സൂ ചിയുടെ ഭാഗത്ത് നിന്ന് ഇതുവരെ പ്രതികരണമൊന്നും ഉണ്ടായിട്ടില്ല.
Discussion about this post