തിരുവനന്തപുരം: ലോക നഴ്സസ് ദിനത്തിൽ ആശംസകളുമായി മുഖ്യമന്ത്രി പിണറായി വിജയൻ. മഹാമാരിക്കാലത്തെ പേരാട്ടത്തിൽ വിസ്മരിക്കാൻ കഴിയാത്ത പങ്കാണ് നഴ്സുമാർക്ക് ഉള്ളതെന്ന് മുഖ്യമന്ത്രി പറഞ്ഞു. കേരളത്തിലെ നഴ്സുമാർക്ക് സുരക്ഷിത സാഹചര്യത്തിൽ ജോലി ചെയ്യാനുള്ള എല്ലാ സാഹചര്യവും എൽഡിഎഫ് സർക്കാർ ഒരുക്കുമെന്നും അദ്ദേഹം വ്യക്തമാക്കി. ഫേസ്ബുക്കിലൂടെയായിരുന്നു പിണറായി വിജയന്റെ പ്രതികരണം.
ലോക നഴ്സസ് ദിനമാണിന്ന്. മഹാമാരികൾക്കെതിരെയുള്ള മനുഷ്യരാശിയുടെ പോരാട്ടങ്ങളിൽ വിസ്മരിക്കാൻ പറ്റാത്ത പങ്കുവഹിക്കുന്നവരാണ് ലോകമെങ്ങുമുള്ള നഴ്സുമാർ. വെല്ലുവിളികളെ മറികടന്ന് സേവനസന്നദ്ധതയോടെ പ്രവർത്തിക്കുന്ന എല്ലാ നഴ്സുമാർക്കും അഭിവാദ്യങ്ങൾ.
നഴ്സുമാരുടെ ഭാവി സുരക്ഷിതവും ഐശ്വര്യപൂർണ്ണവുമാക്കുന്നതും വഴി മാത്രമേ ആരോഗ്യപൂർണമായൊരു നല്ല നാളെയെ യാഥാർഥ്യമാക്കാനാകൂവെന്ന സന്ദേശമാണ് ഈ വർഷത്തെ നഴ്സസ് ദിനം മുന്നോട്ടുവെക്കുന്നത്. മികച്ച വേതനവും സുരക്ഷിതമായ തൊഴിലിടങ്ങളും മെച്ചപ്പെട്ട തൊഴിലന്തരീക്ഷവും നഴ്സുമാർക്ക് ഒരുക്കാൻ നമുക്കാകേണ്ടതുണ്ട്. ആതുരസേവന രംഗത്ത് ലോകത്താകെ ഇടപെടുന്നവരും പ്രശംസ പിടിച്ചുപറ്റുന്നവരുമാണ് കേരളത്തിൽ നിന്നുള്ള നഴ്സുമാർ. അവരുടെ ക്ഷേമത്തിനായുള്ള എല്ലാ നടപടികളും എൽഡിഎഫ് സർക്കാർ സ്വീകരിക്കും.
സിസ്റ്റർ ലിനിയെ സ്മരിക്കാനുള്ള അവസരം കൂടിയാണ് ഈ ദിനം. നഴ്സുമാരുടെ ജീവിതം കൂടുതൽ മെച്ചപ്പെട്ടതാക്കാൻ നാമെല്ലാവരും ഒരുമിച്ച് നിൽക്കണം. ഈ ലോക നഴ്സസ് ദിനം അതിനുള്ള ഊർജ്ജം പകരട്ടെയെന്നും പിണറായി വിജയൻ ആശംസിച്ചു.
Discussion about this post