ടൈപ്പ് 2 പ്രമേഹം ഉള്ളവരില്‍ ഭാവിയില്‍ വൃക്കരോഗമുണ്ടാകാന്‍ സാധ്യതയുണ്ടോ എന്നറിയുന്നതിനുള്ള പുതിയൊരു രീതി വിഭാവനം ചെയ്ത് ഗവേഷകര്‍. ക്ലിനിക്കല്‍ ഡാറ്റയും അതിനൂതന സാങ്കേതികവിദ്യയും സംയോജിപ്പിച്ചുകൊണ്ട് ടൈപ്പ് 2 പ്രമേഹ രോഗികളില്‍ വൃക്കരോഗമുണ്ടാകാന്‍ സാധ്യതയുണ്ടോയെന്നും ഇനി ഉണ്ടെങ്കില്‍ അതൊഴിവാക്കുന്ന രീതിയിലുള്ള ചികിത്സ നല്‍കാനും സാധിക്കുന്ന തരത്തിലുള്ള പുതിയ രോഗനിര്‍ണ്ണയ രീതിയാണ് സ്റ്റാന്‍ഫോര്‍ഡ് ബര്‍ഹം പ്രിബിസിലെ ഗവേഷകര്‍ അവതരിപ്പിച്ചിരിക്കുന്നത്. നേച്ചര്‍ കമ്മ്യൂണിക്കേഷന്‍സ് എന്ന ജേണല്‍ ഇവരുടെ പഠനം പ്രസിദ്ധീകരിച്ചിട്ടുണ്ട്.
ലോകത്ത് വൃക്ക തകരാറിലാകുന്നതിന്റെ പ്രധാന കാരണങ്ങളിലൊന്നാണ് പ്രമേഹം. ഏഷ്യയില്‍ 50 ശതമാനം അവസാന സ്റ്റേജിലുള്ള വൃക്കരോഗത്തിന്റെയും ഡയാലിസിസിന്റെയും കാരണം പ്രമേഹമാണ്. അമേരിക്കയില്‍ അത് 44 ശതമാനമാണ്. ഭാവിയില്‍ പ്രമേഹരോഗികളിലെ വൃക്കരോഗ സാധ്യത പ്രവചിക്കാന്‍ ഏറ്റവും സഹായകരമായ ഒരു കണ്ടെത്തലാണ് തങ്ങളുടെ പഠനത്തിലുള്ളതെന്ന് സ്റ്റാന്‍ഫോര്‍ഡ് ബര്‍ഹം പ്രിബിസിലെ ബയോഇന്‍ഫോര്‍മാറ്റിക്‌സ് പ്രഫസറും ഡയറക്ടറുമായ കെവിന്‍ ഇപ് പറയുന്നു. പ്രമേഹരോഗികളിലെ വൃക്കരോഗം ഭേദമാക്കുന്നതിനുള്ള ചികിത്സാരീതികള്‍ വികസിപ്പിക്കുന്നതില്‍ വലിയ പുരോഗതിയാണ് ഉണ്ടായിക്കൊണ്ടിരിക്കുന്നത്. പക്ഷേ ക്ലിനിക്കല്‍ വിവരങ്ങളെ മാത്രം ആശ്രയിച്ച് ഒരു പ്രമേഹരോഗിക്ക് വൃക്കരോഗം വരുമോ എന്ന് പ്രവചിക്കുന്നതിനുള്ള രോഗനിര്‍ണ്ണയ സംവിധാനങ്ങള്‍ കുറവാണ്. അതുകൊണ്ടുതന്നെ ആരിലാണ് പ്രമേഹം മൂലമുള്ള കിഡ്‌നി രോഗം വരാന്‍ ഏറ്റവുമധികം സാധ്യത എന്ന് പ്രവചിക്കുന്ന സംവിധാനം വളരെ പ്രധാനപ്പെട്ടതാണെന്ന് പഠനത്തിന്റെ ഭാഗമായ, ഹോങ്കോംഗ് സര്‍വ്വകലാശാലയിലെ മെഡിസിന്‍ ആന്‍ഡ് തെറപ്യൂട്ടിക്‌സ് വിഭാഗം പ്രഫസര്‍ റൊണാള്‍ഡ് മാ പറയുന്നു.
ഡിഎന്‍എ മീഥൈലേഷന്‍ എന്ന പ്രക്രിയയിലെ വിശദാംശങ്ങളെ അടിസ്ഥാനമാക്കിയാണ് പ്രമേഹ രോഗികളില്‍ വൃക്കരോഗമുണ്ടാകാനുള്ള സാധ്യത കണക്കാക്കുന്നത്. ഡിഎന്‍എയില്‍ എളുപ്പത്തില്‍ കണ്ടുപിടിക്കാനാകാത്ത മാറ്റങ്ങള്‍ സംഭവിക്കുന്ന പ്രക്രിയയാണിത്. ഏതൊക്കെ ജീനുകളാണ് പ്രവര്‍ത്തനസജ്ജമാകുന്നത്, പ്രവര്‍ത്തന രഹിതമാകുന്നത് തുടങ്ങിയ വളരെ പ്രധാനപ്പെട്ട വിവരങ്ങള്‍ എന്‍കോഡ് ചെയ്യാന്‍ ഡിഎന്‍എ മീഥൈലേഷന്‍ എന്ന പ്രക്രിയയ്ക്ക് കഴിയും. കേവലമൊരു രക്ത പരിശോധനയിലൂടെ ഡിഎന്‍എ മീഥൈലേഷന്‍ പ്രക്രിയയിലെ വിശദാംശങ്ങള്‍ കണ്ടെത്താന്‍ സാധിക്കുമെന്നതാണ് ഈ പുതിയ കണ്ടെത്തലിന്റെ നേട്ടം.
തങ്ങള്‍ മുന്നോട്ട് വെക്കുന്ന രീതി അനുസരിച്ച് രക്ത സാംപിളിലുള്ള മീഥൈലേഷന്‍ മാര്‍ക്കറുകള്‍ ഉപയോഗിച്ച് നിലവിലെ വൃക്കയുടെ പ്രവര്‍ത്തനവും ഭാവിയിലെ പ്രവര്‍ത്തനവും പ്രവചിക്കാന്‍ സാധിക്കുമെന്ന് ഗവേഷകര്‍ പറയുന്നു. ഹോങ്കോംഗ് ഡയബറ്റിസ് രജിസ്റ്ററിലുള്ള 1,200ഓളം രോഗികളുടെ വിശദമായ വിവരങ്ങള്‍ പഠനവിധേയമാക്കിയാണ് ഗവേഷകര്‍ തങ്ങളുടെ പുതിയ രോഗനിര്‍ണ്ണയ മാതൃക വികസിപ്പിച്ചത്. ടൈപ്പ് 2 പ്രമേഹമുള്ള 326 അമേരിക്കക്കാരില്‍ ഗവേഷകര്‍ തങ്ങളുടെ പുതിയ രോഗനിര്‍ണ്ണയ രീതി പരീക്ഷിക്കുകയും ചെയ്തു.
ഏറെ പ്രതീക്ഷയുണര്‍ത്തുന്ന ഈ പുതിയ രോഗനിര്‍ണ്ണയ രീതി കൂടുതല്‍ കുറ്റമറ്റതും കാര്യക്ഷമവും ആക്കുന്നതിനുള്ള പണിപ്പുരയിലാണ് ഗവേഷകര്‍ ഇപ്പോള്‍.
Discussion about this post