തിരുവനന്തപുരം/ മുംബൈ: 63ാമത് പിറന്നാൾ ദിനം മുംബൈയിൽ ആഘോഷമാക്കി നടൻ മോഹൻലാൽ. ഏഞ്ചൽസ് ഹട്ടിലെ കുട്ടികൾക്കൊപ്പമായിരുന്നു അദ്ദേഹത്തിന്റെ ഇത്തവണത്തെ പിറന്നാൾ ആഘോഷം. ഇതിന്റെ ചിത്രങ്ങൾ മോഹൻലാൽ ഫേസ്ബുക്കിൽ പങ്കുവെച്ചിട്ടുണ്ട്.
മുംബൈയിലെ നിരന്ത എയർപോർട്ട് ട്രാൻസിറ്റ് ഹോട്ടലിയായിരുന്നു പിറന്നാൾ ആഘോഷം സംഘടിപ്പിച്ചിരുന്നത്. ഏഞ്ചൽസ് ഹട്ടിലെ കുട്ടികൾക്കൊപ്പം നടത്തിപ്പുകാരും, ജീവനക്കാരും ആഘോഷപരിപാടിയിൽ പങ്കെടുത്തു. കേക്ക് മുറിച്ചായിരുന്നു ആഘോഷം. ഇതിന് ശേഷം അദ്ദേഹം കുട്ടികൾക്ക് സമ്മാനവും നൽകി.
സാമ്പത്തികമായി പിന്നോക്കം നിൽക്കുന്ന കുടുംബത്തിലെ പെൺകുട്ടികളെ സംരക്ഷിക്കുന്ന കേന്ദ്രമാണ് ഏഞ്ചൽസ് ഹട്ട്. ഹം ഫൗണ്ടേഷന്റെ കീഴിലാണ് ഈ കേന്ദ്രം പ്രവർത്തിക്കുന്നത്.
കുഞ്ഞ് മാലാഖമാരുടെ അനുഗ്രഹത്താൽ തന്റെ പിറന്നാൾ ആഘോഷം ഗംഭീരമായെന്ന് മോഹൻലാൽ സമൂഹമാദ്ധ്യമത്തിൽ കുറിച്ചു. പരിപാടി സംഘടിപ്പിച്ചവർക്കും ആശംസ നേർന്നവർക്കും നന്ദി പറയുകയാണെന്നും അദ്ദേഹം വ്യക്തമാക്കി. അതേസമയം അദ്ദേഹം പങ്കുവച്ച ചിത്രങ്ങൾ സമൂഹമാദ്ധ്യമങ്ങളിൽ തരംഗമായിരിക്കുകയാണ്.
