ലണ്ടൻ: യുകെയിലെ സർവ്വകലാശാലകളിൽ എസ്എഫ്ഐ ആവേശകരമായ സാന്നിദ്ധ്യമാണെന്ന് സമൂഹമാദ്ധ്യമത്തിൽ സ്ഥാപിക്കാൻ ശ്രമിച്ച എഎ റഹീം എംപിക്ക് ട്രോൾ പെരുമഴ. യുകെയിൽ സന്ദർശനം നടത്തുന്ന സിപിഎം സംസ്ഥാന സെക്രട്ടറി എംവി ഗോവിന്ദനുമൊത്ത് ഏതാനും ഇന്ത്യൻ വിദ്യാർത്ഥികൾ നിൽക്കുന്ന ചിത്രം പങ്കുവെച്ചായിരുന്നു റഹീമിന്റെ അവകാശവാദം. ചിത്രത്തിന്റെ കമന്റ് ബോക്സിലും പ്രതികരണത്തിലും ട്രോളുകളും ചിരി സ്മൈലികളും നിറയുകയാണ്.
“യുകെയിലെ ഇന്ത്യൻ വിദ്യാർത്ഥികൾക്കിടയിൽ അഭിമാനകരമായ പ്രവർത്തനങ്ങളാണ് എസ്എഫ്ഐ യുകെ സംഘടിപ്പിക്കുന്നതെന്നും ലണ്ടനിലെ വിവിധ സർവകലാശാലകളിൽ ആവേശകരമായ സാന്നിധ്യമാണ് എസ്എഫ്ഐ എന്നും റഹീം പറയുന്നു. ലണ്ടൻ സന്ദർശനം നടത്തിവരുന്ന സഖാവ് എംവി ഗോവിന്ദൻ മാസ്റ്റർക്കൊപ്പം എസ്എഫ്ഐയുടെ യുകെയിലെ നേതൃനിര” എന്ന് പറഞ്ഞാണ് ചിത്രം പോസ്റ്റ് ചെയ്തത്.
രസകരമായ കമന്റുകളാണ് റഹീമിന്റെ പോസ്റ്റിന് ലഭിക്കുന്നത്. യുകെയിലെ സർവ്വകലാശാലകൾ ഇനി എസ്എഫ്ഐ ഭരിക്കുമെന്ന് തുടങ്ങി യുകെ സർവ്വകലാശാലകളിൽ തിരഞ്ഞെടുപ്പിന്റെ സ്ഥാനാർത്ഥി നിർണയം എകെജി സെന്ററിൽ പൂർത്തിയായെന്ന് വരെ നീളുന്നു കമന്റുകൾ. യുകെയുടെ കാര്യത്തിൽ ഏതാണ്ട് തീരുമാനമായെന്നാണ് ബിജെപി നേതാവ് കൂടിയായ അഡ്വ. ബി ഗോപാലകൃഷ്ണൻ റഹീമിന് നൽകിയ മറുപടി. എസ്എഫ്ഐയിലൂടെ സിപിഎം യുകെയുടെ ഭരണം അട്ടിമറിച്ചേക്കുമെന്നും ബൂർഷ്വകൾ തുലയട്ടെ ലാൽ സലീം എന്നും ബി ഗോപാലകൃഷ്ണൻ പരിഹസിക്കുന്നു.
അവിടെ എങ്ങനെയാ പ്രിൻസിപ്പാളിന് റീത്ത് വെക്കാനും ആദരാഞ്ജലി അർപ്പിക്കാനുമൊക്കെ പറ്റുന്നുണ്ടോയെന്നാണ് വേറൊരാളുടെ ചോദ്യം. ഇവിടെ നിന്നും അവിടുത്തെ സർവ്വകലാശാലകളിൽ പഠിക്കാൻ പോയ മലയാളികൾ ഉൾപ്പെടെയുളള വിദ്യാർത്ഥികളെ സംഘടിപ്പിച്ചാണ് എസ്എഫ്ഐ യുകെ എന്ന പേരിൽ യൂണിറ്റ് രൂപീകരിച്ചത്.
അടുത്തിടെ എഎ റഹീം യുകെയിൽ എത്തിയപ്പോഴും എസ്എഫ്ഐ ഘടകം നേതാക്കളുടെ ചിത്രങ്ങളും അവർക്കൊപ്പം പങ്കെടുക്കുന്ന പരിപാടികളും സമൂഹമാദ്ധ്യമങ്ങളിൽ പോസ്റ്റ് ചെയ്തിരുന്നു.
Discussion about this post