ചെന്നൈ: കുടുംബവഴക്കിനെ തുടർന്ന് പുരുഷവേഷത്തിലെത്തി ഭർതൃമാതാവിനെ ആക്രമിച്ച് കൊലപ്പെടുത്തിയ യുവതി അറസ്റ്റിൽ. തമിഴ്നാട്ടിലെ തിരുനെൽവേലിയിലാണ് സംഭവം. തിരുനെൽവേലിയിലെ തുളുക്കർകുളം പഞ്ചായത്ത് വൈസ് പ്രസിഡന്റ് ഷൺമുഖവേലിന്റെ ഭാര്യ സീതാരാമലക്ഷ്മി(58)യാണ് വീട്ടിനുള്ളിൽ ഉറങ്ങിക്കിടക്കുമ്പോൾ ഇരുമ്പുദണ്ഡുകൊണ്ട് അടിയേറ്റ് മരിച്ചത്. സീതാരാമലക്ഷ്മിയുടെ മകൻ രാമസ്വാമിയുടെ ഭാര്യ മഹാലക്ഷ്മി(27)യാണ് സംഭവവുമായി ബന്ധപ്പെട്ട് അറസ്റ്റിലായത്.
അന്വേഷണം വഴിതെറ്റിക്കുന്നതിനായി സീതാലക്ഷ്മിയുടെ അഞ്ച് പവന്റെ മാലയും മഹാലക്ഷ്മി മോഷ്ടിച്ച് കൊണ്ടുപോയിരുന്നു. ഇന്നലെ പുലർച്ചെ ഹെൽമറ്റും ജാക്കറ്റും ധരിച്ച് പുരുഷവേഷത്തിലെത്തിയാണ് ആക്രമണം നടത്തിയത്. ചോരയിൽ കുളിച്ച് കിടന്ന് ഇവരെ സമീപവാസികൾ ഉടനെ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മോഷ്ടാക്കളാണ് കൊല നടത്തിയത് എന്നായിരുന്നു പ്രാഥമിക നിഗമനം. ബന്ധുക്കളുടെ സാന്നിദ്ധ്യത്തിൽ സിസിടിവി ദൃശ്യങ്ങൾ പരിശോധിച്ചപ്പോഴാണ് മഹാലക്ഷ്മിയാണെന്ന് മനസിലായത്.
ഭർതൃമാതാവുമായുള്ള പ്രശ്നങ്ങളെ തുടർന്ന് ഒരു വർഷം മുൻപ് മഹാലക്ഷ്മിയും ഭർത്താവ് രാമസ്വാമിയും രണ്ട് കുട്ടികളും താമസം മാറ്റുകയായിരുന്നു. കഴിഞ്ഞ ദിവസം സീതാരാമലക്ഷ്മി അയൽവാസികൾക്ക് മുന്നിൽ വച്ച് മഹാലക്ഷ്മിയെ അപമാനിച്ചിരുന്നു. ഇതാണ് കൊലപാതകത്തിന് പ്രേരണയായതെന്നും പോലീസ് പറഞ്ഞു.
Discussion about this post