മീററ്റ്; പെറ്റ് ഡോഗിന്റെ ജൻമദിനം ആഘോഷമാക്കി മീററ്റിലെ ഒരു കോളജ് പ്രൊഫസർ. ട്രാൻസ്ലാം കോളജിലെ ഫാർമസി വിഭാഗം പ്രൊഫസർ ഡോ. ഷമീം അഹമ്മദ് ആണ് വമ്പൻ ആഘോഷമൊരുക്കി നാട്ടുകാരെ അമ്പരപ്പിച്ചത്.
സെന്റ് ബർണാഡ് ബ്രീഡിൽ പെട്ട അലക്സ് എന്ന പെറ്റ് ഡോഗിന്റെ ജൻമദിനമാണ് പ്രൊഫസർ ആഘോഷമാക്കിയത്. സുഹൃത്തുക്കളും നാട്ടുകാരും ഉൾപ്പെടെ 300 ലധികം പേരെ ബർത്ത് ഡേ പാർട്ടിക്ക് ക്ഷണിച്ചിരുന്നു. പ്രത്യേക വീഡിയോ സന്ദേശം തയ്യാറാക്കി വാട്സ്ആപ്പിലൂടെ അയച്ചുനൽകിയായിരുന്നു അതിഥികളെ ക്ഷണിച്ചത്.
11 കിലോയുടെ കേക്കാണ് മുറിച്ചത്. വീഡിയോ കോൺഫറൻസ് വഴി വിദേശത്തുളള പ്രൊഫസറുടെ സുഹൃത്തുക്കളും ആഘോഷത്തിൽ പങ്കുചേർന്നു. ബർത്ത് ഡേയ്ക്ക് സമ്മാനവുമായി എത്തിയവർക്ക് പ്രൊഫസർ തിരിച്ചും സമ്മാനങ്ങൾ നൽകി. ഇവരിലെ ഭാഗ്യവാനാണ് നറുക്കെടുപ്പിലൂടെ ഫ്രിഡ്ജ് ലഭിച്ചത്. അനസ് എന്ന അതിഥിയാണ് ഫ്രിഡ്ജ് സ്വന്തമാക്കിയത്.
ഡോ. ഷമീമിന്റെ മൃഗസ്നേഹം നാട്ടുകാർക്ക് പരിചിതമാണ്. വളർത്തുമൃഗങ്ങൾക്കൊപ്പം തെരുവുമൃഗങ്ങളെയും സംരക്ഷിക്കാൻ അദ്ദേഹം എന്നും മുൻപിലുണ്ടെന്ന് നാട്ടുകാർ പറയുന്നു. തന്റെ വരുമാനത്തിലെ വലിയ ഒരു ഭാഗം പ്രൊഫസർ ഇതിനായി ചിലവിടാറുമുണ്ട്. ബർത്ത് ഡേയുടെ ഭാഗമായി നിരവധി തെരുവുമൃഗങ്ങൾക്കും ഡോ. ഷെമീം ഭക്ഷണം നൽകിയിരുന്നു.
