കോഴിക്കോട്: സിപിഎമ്മിനെ പിടിച്ചുലച്ച കനത്ത തിരഞ്ഞെടുപ്പ് പരാജയത്തിന് പിന്നാലെ പാർട്ടിയിലെ തെറ്റുതിരുത്തലുകൾ ചർച്ച ചെയ്യാൻ വിപുലീകൃത സംസ്ഥാന സമിതി യോഗം ചേരുന്നതിനിടെ നേതൃത്വത്തിനെതിരെ രൂക്ഷവിമർശനങ്ങളുമായി ടി.കെ. ഗോവിന്ദൻ എംഎൽഎ. വിപുലീകൃത സംസ്ഥാന കമ്മിറ്റിയിലെ പൊതുചർച്ചകളെക്കുറിച്ച് ഇപ്പോൾ പരസ്യമായി പ്രതികരിക്കുന്നില്ലെന്ന് വ്യക്തമാക്കിയ അദ്ദേഹം, പാർട്ടിയെ അടിമുടി ബാധിച്ചിരിക്കുന്ന ‘പാർലമെന്ററി വ്യാമോഹം’ സാധാരണ പ്രവർത്തകർക്കല്ല മറിച്ച് ഉന്നത നേതൃത്വത്തിനാണെന്ന് തുറന്നടിച്ചു. മുന്നണിയെ നയിക്കാൻ ഇന്നും മുഖ്യമന്ത്രി പിണറായി വിജയന് പകരമായി മറ്റൊരു നേതാവ് നിലവിലില്ലെന്ന് ചൂണ്ടിക്കാട്ടിയ അദ്ദേഹം, സംസ്ഥാന സെക്രട്ടറി എം.വി. ഗോവിന്ദനെതിരെയും പാർട്ടിയിലെ അധികാരക്കസേര മോഹങ്ങൾക്കെതിരെയും ആഞ്ഞടിച്ചതാണ് ഇപ്പോൾ രാഷ്ട്രീയ കേന്ദ്രങ്ങളിൽ വലിയ ചർച്ചയായിരിക്കുന്നത്.
പാർലമെന്ററി വ്യാമോഹം എന്നത് സിപിഎമ്മിൽ ഇപ്പോൾ മാത്രം പറഞ്ഞുതുടങ്ങിയ ഒന്നല്ലെന്നും പാർട്ടിയെ ദീർഘകാലമായി കാർന്നുതിന്നുന്ന ഒരു രോഗമാണെന്നും അദ്ദേഹം ഓർമ്മിപ്പിച്ചു. ഇ.എം.എസ് ജീവിച്ചിരുന്ന കാലത്തുതന്നെ ഈ വിഷയത്തിൽ പാർട്ടിക്ക് അതിശക്തമായ താക്കീത് നൽകിയിട്ടുള്ളതാണ്. പാവപ്പെട്ട താഴെത്തട്ടിലെ സാധാരണ പാർട്ടി മെമ്പർമാർക്കൊന്നും ഇത്തരത്തിലുള്ള യാതൊരു വ്യാമോഹവുമില്ല. എന്നാൽ അധികാര സ്ഥാനങ്ങളിലേക്ക് എത്താൻ വെമ്പൽ കൊള്ളുന്ന പാർട്ടി നേതൃത്വത്തെയാണ് പാർലമെന്ററി വ്യാമോഹം ബാധിച്ചിരിക്കുന്നത്. ഇതിനെതിരെ പാർട്ടിക്കുള്ളിൽ തന്നെ ഒട്ടേറെ ചർച്ചകൾ മുൻപും നടന്നിട്ടുണ്ടെങ്കിലും അതുകൊണ്ടൊന്നും ഒരു ഫലവും ഇതുവരെ ഉണ്ടായിട്ടില്ല. എല്ലാവർക്കും പാർലമെന്ററി സ്ഥാനമാനങ്ങളിൽ എങ്ങനെയെങ്കിലും കയറിപ്പറ്റാനുള്ള നെട്ടോട്ടമാണ് ഇപ്പോൾ നടക്കുന്നത്. താൻ പതിറ്റാണ്ടുകളായി പാർട്ടിയിൽ വിശ്വസ്തതയോടെ പ്രവർത്തിക്കുന്ന ആളാണ്. പലതവണ മത്സരരംഗത്തേക്ക് പേര് വന്നിട്ടുണ്ടെങ്കിലും അപ്പോഴൊന്നും തനിക്ക് സ്ഥാനമാനങ്ങളോട് യാതൊരു അത്യാഗ്രഹവും തോന്നിയിട്ടില്ല. എന്നാൽ അഞ്ചും എട്ടും തവണ തുടർച്ചയായി മത്സരരംഗത്തിറങ്ങുന്ന ആളുകൾ പാർട്ടിയിലുണ്ട്. നാലാമതൊരു തവണ മത്സരിക്കുന്നതിനെ താൻ എതിർത്തതിനെയാണ് ചിലർ പാർലമെന്ററി വ്യാമോഹമെന്ന് മുദ്രകുത്തുന്നതെങ്കിൽ അത് അങ്ങനെ തന്നെയായിക്കോട്ടെയെന്നും അദ്ദേഹം പരിഹസിച്ചു.
പാർട്ടിയിലും മുന്നണിയിലുമുള്ള നേതൃത്വ സമവാക്യങ്ങളെക്കുറിച്ചും അദ്ദേഹം തുറന്നുപറഞ്ഞു. ഇടതുമുന്നണിയെ ശക്തമായി നയിക്കാൻ ഇന്നും പിണറായി വിജയൻ മാത്രമേയുള്ളൂ. നിലവിലുള്ള നേതൃനിര പരിശോധിച്ചാൽ പിണറായി വിജയന് ബദലായി ഉയർത്തിക്കാട്ടാൻ മറ്റൊരു നേതാവുണ്ടെന്ന് താൻ കരുതുന്നില്ല. എന്നാൽ പാർട്ടി സംസ്ഥാന സെക്രട്ടറി പരമയോഗ്യനാണെന്ന നിലപാട് തനിക്കില്ല. സംസ്ഥാന സെക്രട്ടറിയുടെ കസേരയിലിരിക്കാൻ അർഹതയുള്ള നിരവധി പേർ ഇപ്പോഴും പാർട്ടിയിലുണ്ട്. പാർട്ടി നേതൃത്വത്തോട് താഴെത്തട്ടിലുള്ള അണികൾക്ക് കടുത്ത അതൃപ്തിയും അമർഷവുമാണുള്ളത്. ഈ അതൃപ്തി എത്രത്തോളമുണ്ടെന്ന് തിരിച്ചറിയാൻ പാർട്ടി നേതൃത്വത്തിന് കഴിയണം. പാർട്ടിയിലെ അസംതൃപ്തരെ കണ്ടെത്തി അവരുടെ പ്രശ്നങ്ങൾക്ക് പരിഹാരം കാണാൻ നേതൃത്വത്തിന് സാധിക്കുന്നില്ല. താഴെത്തട്ടിൽ അണികൾക്കിടയിലുണ്ടായ ഈ കടുത്ത അതൃപ്തിക്കും നിരാശയ്ക്കും പൂർണ്ണ ഉത്തരവാദി പാർട്ടി നേതൃത്വം തന്നെയാണെന്നും ടി.കെ. ഗോവിന്ദൻ എംഎൽഎ വ്യക്തമാക്കി.
