നല്ല ഗുണമേന്മയുള്ള സാധനങ്ങളെന്ന് കരുതി പണവും സമയവും മുടക്കിയിട്ട് ഒരുതവണയെങ്കിലും വ്യാജ ഉൽപ്പന്നങ്ങൾ കൊണ്ട് തൃപ്തിപ്പെടേണ്ടി വന്നവരാകും നമ്മളിൽ പലരും. ഒരിക്കലെങ്കിലും വ്യാജന്മാർ പണി തന്നിട്ടുണ്ടാവും. ഡിമാൻഡുള്ള സാധനങ്ങൾക്ക് വ്യാജന്മാരുണ്ടാകുക സാധാരണയാണ്. എന്നാൽ അൽപ്പം ശ്രദ്ധിച്ചാൽ, ചില വിദ്യകളൊക്കെ പ്രയോഗിച്ചാൽ വ്യാജന്മാരെ അകറ്റി നിർത്താം
ആദ്യം തന്നെ വിപണിയിലെത്തുന്ന ബ്രാൻഡഡ് ഉൽപ്പന്നങ്ങൾ വൻവിലക്കിഴിവിൽ ലഭിക്കില്ലെന്ന വസ്തുത മനസിലാക്കുക. വലിയ ഓഫറിൽ ലഭിക്കുന്ന ബ്രാൻഡഡ് ഉൽപ്പന്നങ്ങൾ വിശ്വസനീയമായ സൈറ്റോ,കടയോ ആണ് വിൽപ്പനയ്ക്ക് വച്ചിരിക്കുന്നതെന്ന് പരിശോധിക്കുക. ഡൂപ്ലിക്കേറ്റ്, ഫസ്റ്റ് കോപ്പി, സാധനങ്ങളാണ് പലപ്പോഴും ഇത്തരത്തിൽ വിലകുറവെന്ന് കാണിച്ച് നൽകാറുള്ളത്.
വ്യാജ ഉൽപ്പന്നങ്ങളുടെ പാക്കേജിംഗ് പലപ്പോഴും മോശമായിരിക്കും, ഉൽപ്പന്നത്തിന്റെ പാക്കേജിൽ അക്ഷരത്തെറ്റുകൾ, ഗ്രാഫിക്സിൽ മാറ്റം,ഡിസൈനിൽ മാറ്റം, പ്രിന്റിങ്ങിലെ വ്യത്യാസം എന്നിവ അൽപ്പം സൂക്ഷിച്ചാൽ മനസിലാവും.
അസാധാരണ ഘടന- വ്യാജ വസ്തുക്കളുടെ ഘടന യഥാർത്ഥ ഇനങ്ങളിൽ നിന്ന് വ്യത്യസ്തമായിരിക്കാം. ഉദാഹരണത്തിന്, വ്യാജ വസ്ത്രങ്ങൾക്ക് ചെറിയ പോറലോ, ഗുണമേന്മ കുറഞ്ഞതോ ആയ ഫാബ്രിക് ഉണ്ടായിരിക്കാം. ഉൽപ്പന്നങ്ങൾക്ക് കളറിലോ മണത്തിലോ രുചിയിലോ വ്യത്യാസം അനുഭവപ്പെടാം.
കുറഞ്ഞ വില – ഒരു ഉൽപ്പന്നം സാധാരണയേക്കാൾ വളരെ കുറഞ്ഞ വിലയ്ക്കാണ് വിൽക്കുന്നതെങ്കിൽ, ഇത് പലപ്പോഴും വ്യാജമാണെന്ന് മനസിലാക്കാം.
വാറന്റി- മിക്ക ഉൽപ്പന്നങ്ങൾക്കും കമ്പനികൾ വാറന്റി നൽകാറുണ്ട്. എന്നാൽ വ്യാജ ഉൽപ്പന്നങ്ങൾക്ക് വാറന്റിയോ ഉപഭോക്തൃ സഹായമോ നൽകാറില്ല.
വ്യാജ സൈറ്റുകൾ- വ്യാജ ഉൽപ്പന്നങ്ങൾ, ഡ്യൂപ്ലിക്കേറ്റ് സാധനങ്ങൾ പലപ്പോഴും വ്യാജ സൈറ്റുകളിലായിരിക്കും വിൽപ്പനയ്ക്ക് വച്ചിട്ടുണ്ടാകുക. ഇത്തരം സൈറ്റുകളുടെ യുആർഎൽ പരിശോധിച്ച് ഒർജിനലാണെന്ന് ഉറപ്പ് വരുത്തിയ മാത്രം പർച്ചേയ്സ് ചെയ്യുക.
ലോഗോ- വ്യാജ ഉൽപ്പന്നങ്ങളുടെ ലോഗോ, പലപ്പോഴും ഒർജിനൽ ഉൽപ്പന്നത്തിനോട് 90 ശതമാനം സാമ്യമുള്ളതായിരിക്കും. വളരെ സൂക്ഷിച്ച് യഥാർത്ഥ ലോഗോ തന്നെയെന്ന് ഉറപ്പ് വരുത്തുക.
