ബെയ്ജിംഗ് : സ്റ്റാർ വാഴ്സ് മോഡലിൽ യുദ്ധക്കപ്പൽ നിർമ്മിക്കാൻ ചൈന പദ്ധതിയിടുന്നുവെന്ന റിപ്പോർട്ടുകളാണ് പുറത്തുവരുന്നത്. പരമ്പരാഗത നാവികസേന കപ്പലുകൾക്ക് വെല്ലുവിളിയായി ഒരു യുദ്ധക്കപ്പലിന്റെ ബ്ലൂപ്രിന്റ് ചൈനീസ് നാവിക ശാസ്ത്രജ്ഞൻ പുറത്തിറക്കിയിട്ടുണ്ട്. അത്യാധുനിക നാവിക സാങ്കേതിക വിദ്യകൾ വികസിപ്പിക്കുന്നതിൽ പ്രധാനിയായ ചൈനീസ് നാവികസേനയുടെ റിയർ അഡ്മിറൽ മാ വെയ്മിംഗാണ് സ്റ്റാർ വാർസ്-എസ്ക്യൂ കപ്പലിന്റെ ലേ ഔട്ട് അവതരിപ്പിച്ചത്.
ഈ കപ്പൽ നാവിക യുദ്ധത്തിൽ വിപ്ലവം സൃഷ്ടിക്കുമെന്നും ലോകം ഇതുവരെ കണ്ടതിൽ നിന്ന് വളരെ വ്യത്യസ്തമായിരിക്കുമെന്നും അദ്ദേഹം അവകാശപ്പെട്ടു. നൂറു വർഷത്തിലേറെയായി നിലനിൽക്കുന്ന നാവികസേനാ കപ്പലുകളെ ഇത് പൂർണ്ണമായും പൊളിച്ചെഴുതുമെന്നും മാ പറഞ്ഞു.
ഈ യുദ്ധക്കപ്പൽ ഒരു കപ്പൽ പടയുടെ ദൗത്യം നിർവ്വഹിക്കുമെന്നും മാ പറഞ്ഞു. കപ്പലിൽ ഇലക്ട്രോമാഗ്നറ്റിക് ആയുധങ്ങളും ആണവോർജ്ജം ഉപയോഗിച്ചുളള വൈദ്യുത സംവിധാനവും ഉണ്ടായിരിക്കും. വ്യോമാക്രമണങ്ങൾ, അന്തർവാഹിനികൾക്കെതിരെയുളള യുദ്ധങ്ങൾ എന്നിവയിൽ നിന്ന് പ്രതിരോധിക്കാൻ റെയിൽ ഗൺ, കോയിൽ ഗൺ, റോക്കറ്റ് ലോഞ്ചറുകൾ, ലേസർ ആയുധങ്ങൾ, ഹൈ പവേർഡ് മൈക്രോവേവുകൾ തുടങ്ങിയ നൂതന ആയുധങ്ങളുടെ ഒരു നിരയും കപ്പലിൽ ഉൾപ്പെടുത്തുമെന്നാണ് റിപ്പോർട്ട്.
ധാരാളം വിമാനങ്ങൾ വഹിക്കുന്ന യുദ്ധക്കപ്പലിന്റെ കമ്പ്യൂട്ടർ നിർമ്മിത ചിത്രവും വെയ്മിംഗ് ഗവേഷണ പ്രബന്ധത്തിൽ ഉൾപ്പെടുത്തിയിട്ടുണ്ട്. ഇത് ലോകരാജ്യങ്ങളെ ആകെ ആശങ്കയിലാഴ്ത്തിയിരിക്കുകയാണ്.
Discussion about this post