എല്ലാം ഒർജിനൽ; എസ്എഫ്‌ഐ നിഖിലിനൊപ്പം; സർട്ടിഫിക്കറ്റുകൾ വ്യാജമല്ലെന്ന് പിഎം ആർഷോ

ആലപ്പുഴ: വ്യാജസർട്ടിഫിക്കറ്റ് വിവാദത്തിൽ ആരോപണ വിധേയനായ നിഖിൽ തോമസിന് എസ്എഫ്‌ഐയുടെ പിന്തുണ. എംഎസ്എം കോളജിലെ മുൻ എസ്എഫ്‌ഐ യൂണിറ്റ് പ്രസിഡന്റിന് സംഘടന ക്ലീൻ ചിറ്റ് നൽകി.നിഖിൽ ഹാജരാക്കിയ ഡിഗ്രി സർട്ടിഫിക്കറ്റെല്ലാം പരിശോധിച്ചെന്നും എല്ലാം ഒറിജിനലാണെന്നും എസ്എഫ് ഐ സംസ്ഥാന സെക്രട്ടറി പിഎം ആർഷോ വ്യക്തമാക്കി.

‘മുഴുവൻ ഡോക്യുമെന്റ്‌സും നിഖിൽ എസ് എഫ് ഐക്ക് മുന്നിൽ ഹാജരാക്കി. കലിംഗയിൽ പഠിച്ചതും പാസായതും രേഖകളിൽ വ്യക്തമാണ്. അതെല്ലാം പരിശോധിച്ച് എല്ലാം യാഥാർഥ്യമാണെന്നും നിഖിലിന്റേത് വ്യാജ ഡിഗ്രിയല്ലെന്ന് ഉറപ്പാക്കിയെന്നുമാണ് ആർഷോ അവകാശപ്പെടുന്നത്.

എസ്എഫ്‌ഐ നേതാവ് നിഖിൽ തോമസ് കലിംഗ സർവ്വകലാശാലയുടെ ബികോം പഠിച്ചെന്നു പറയുന്ന 2019-20 കാലത്ത് എംഎസ്എം കോളജിലെ എസ്എഫ്‌ഐ യൂണിറ്റ് പ്രസിഡന്റായിരുന്നു. ഈ സമയത്തു കോളജിൽ തുടർച്ചയായി വരാറില്ലെങ്കിലും ഇടയ്ക്കിടെ എത്തുമായിരുന്നെന്നാണു വിദ്യാർത്ഥികൾ നൽകുന്ന വിവരം. നിഖിലിന്റെ അപേക്ഷയിൽ കലിംഗ സർവ്വകലാശാലയുടെ ബികോം സർട്ടിഫിക്കറ്റിനു കേരള സർവകലാശാല അംഗീകാരം നൽകിയത് 2022 ജനുവരി 14ന് ആണ്. നിഖിൽ എംകോം പ്രവേശനം നേടിയത് 31നും ആണെന്നാണ് വിവരം.

കേരള സർവ്വകലാശാലയിൽ ബികോം റജിസ്‌ട്രേഷൻ നിലവിലുള്ളപ്പോഴാണ് നിഖിൽ കലിംഗ സർവകലാശാലയുടെ സർട്ടിഫിക്കറ്റ് ഉപയോഗിച്ചു പ്രവേശനം നേടിയത്.ഒരേ സമയം രണ്ടു സർവ്വകലാശാലകളിൽ ഒരേ കോഴ്‌സിനു റജിസ്‌ട്രേഷൻ നിലനിർത്താൻ ചട്ടങ്ങൾ അനുവദിക്കുന്നില്ല. ഒരിടത്തു പഠനം അവസാനിപ്പിച്ചാൽ ടിസി വാങ്ങിയല്ലാതെ മറ്റൊരിടത്തു ചേരാനും കഴിയില്ല എന്നതാണ് ചട്ടം.

അതേസമയം നിഖിൽ തോമസിൻറെ വ്യാജ ഡിഗ്രി വിവാദത്തിൽ പോലീസ് അന്വേഷണം തുടങ്ങി. ഇന്ന് രാവിലെ കായംകുളം എംഎസ്എം കോളേജ് പ്രിന്‌സിപ്പലിൻറെ മൊഴി നിഖിൽ തോമസ് രേഖപ്പെടുത്തും. കെഎസ്യു ജില്ലാ പോലീസ് മേധാവിക്ക് നൽകിയ പരാതിയിലാണ് നടപടി.