ടെസ്ല സിഇഒയും ട്വിറ്റർ ഉടമയുമായ ഇലാൺ മസ്കുമായി കൂടിക്കാഴ്ച നടത്താനൊരുങ്ങി പ്രധാനമന്ത്രി നരേന്ദ്രമോദി. മൂന്ന് ദിവസത്തെ യുഎസ് പര്യടനത്തിന്റെ ഭാഗമായിട്ടായിരിക്കും കൂടിക്കാഴ്ച. നേരത്തെ 2015ൽ കാലിഫോർണിയയിലെ ടെസ്ല മോട്ടോഴ്സ് ഫാക്ടറി സന്ദർശിച്ചപ്പോഴാണ് പ്രധാനമന്ത്രിയും മസ്കും അവസാനമായി കൂടിക്കാഴ്ച നടത്തിയത്. ഇന്ന് ന്യൂയോർക്കിലെത്തിയ ശേഷം പ്രധാനമന്ത്രി വിവിധ മേഖലകളിൽ നിന്നുള്ള പ്രതിഭകളും വിദഗ്ധരുമായി കൂടിക്കാഴ്ച നടത്തും.
നൊബേൽ സമ്മാന ജേതാക്കൾ, സാമ്പത്തിക വിദഗ്ധർ, കലാകാരന്മാർ, ശാസ്ത്രജ്ഞർ, സംരംഭകർ, അക്കാദമിക് ആരോഗ്യ രംഗങ്ങളിലെ വിദഗ്ധർ തുടങ്ങിയവർ ഇക്കൂട്ടത്തിലുണ്ടാകും. മസ്കിന് പുറമെ എഴുത്തുകാരനും ജ്യോതിശാസ്ത്രജ്ഞനുമായ നീൽ ഡിഗ്രാസ് ടൈസൺ, സാമ്പത്തിക വിദഗ്ധൻ പോൾ റോമർ, സ്റ്റാറ്റിസ്റ്റിഷ്യൻ നിക്കോളാസ് നാസിം തലേബ്, നിക്ഷേപകനായ റേ ഡാലിയോ എന്നിവരുമായും പ്രധാനമന്ത്രി ഇന്ന് കൂടിക്കാഴ്ച നടത്തുമെന്നാണ് വിവരം.
ഇന്തോ-അമേരിക്കൻ ഗായകൻ ഫാലു ഷാ, എഴുത്തുകാരനും ഗവേഷകനുമായ ജെഫ് സ്മിത്ത്, മുൻ യുഎസ് വ്യാപാര പ്രതിനിധി മൈക്കൽ ഫ്രോമാൻ, നയതന്ത്രജ്ഞൻ ഡാനിയൽ റസ്സൽ, പ്രതിരോധ വിദഗ്ധൻ എൽബ്രിഡ്ജ് കോൾബി, ഫിസിഷ്യനും നോബൽ സമ്മാന ജേതാവുമായ ഡോ. പീറ്റർ ആഗ്രെ, ആരോഗ്യ വിദഗ്ധൻ ഡോ. സ്റ്റീഫൻ ക്ലാസ്കോ, ഇന്ത്യൻ-അമേരിക്കൻ വ്യവസായിയും കലാകാരിയുമായ ചന്ദ്രിക ഠണ്ടൻ എന്നിവരും പട്ടികയിലുണ്ട്.
Discussion about this post