തിരുവനന്തപുരം: വീട്ടിലും ഓഫീസിലും ആദായ നികുതി വകുപ്പ് പരിശോധന നടത്തിയെന്ന വാർത്തകൾ നിഷേധിച്ച് വ്‌ളോഗർ സുജിത് ഭക്തൻ. താൻ കൃത്യമായി ആദായ നികുതി അടയ്ക്കുന്നുണ്ടെന്ന് അദ്ദേഹം പറഞ്ഞു. മറ്റ് യൂട്യൂബർമാരുടേതിനൊപ്പം സുജിത് ഭക്തന്റെയും വീട്ടിലും ഓഫീസിലും റെയ്ഡ് നടക്കുന്നതായി ചില ഓൺലൈൻ മാദ്ധ്യമങ്ങൾ വാർത്ത പ്രചരിപ്പിച്ചിരുന്നു. ഇതിന് പിന്നാലെ ഫേസ്ബുക്കിലൂടെയായിരുന്നു അദ്ദേഹത്തിന്റെ പ്രതികരണം.
റെയിഡ് സംബന്ധമായ വാർത്തകൾ ടി വിയിൽ കണ്ടിരുന്നുവെന്ന് സുജിത് ഭക്തൻ വ്യക്തമാക്കി. തന്റെ വീട്ടിൽ ഇതുവരെ റെയ്ഡ് ഒന്നും വന്നിട്ടില്ല. കഴിഞ്ഞ 5 കൊല്ലമായി കൃത്യമായി ഇൻകം ടാക്‌സും ജിഎസ്ടിയും എല്ലാം അടക്കുന്നുണ്ട്. ഇനി വന്നാലും പൂർണ്ണ തോതിൽ സഹകരിക്കാൻ ഞാൻ ബാധ്യസ്ഥനുമാണ്. നിയമം എല്ലാവർക്കും ഒരുപോലെയാണെന്നും സുജിത് ഭക്തൻ പറഞ്ഞു.
രാവിലെയാണ് പ്രമുഖ യൂട്യൂബർമാരുടെ വീട്ടിൽ ആദായ നികുതി വകുപ്പ് പരിശോധന നടത്തിയത്. പ്രതിവർഷം കോടികളുടെ വരുമാനം ഉണ്ടായിട്ടും മുഴുവൻ നികുതിയും നൽകുന്നില്ലെന്ന് പരാതി ഉയർന്നിരുന്നു. ഇതേ തുടർന്നായിരുന്നു പരിശോധന. പേളി മാണി, അർജു, അൺബോക്‌സിംഗ് ഡ്യൂഡ്, ഫിഷിംഗ് ഫ്രീക്ക്, എം4ടെക്, അഖിൽ എൻ.ആർ.ഡി, ജയരാജ് ജി. നാഥ്, കാസ്‌ട്രോ ഗെയിമിംഗ്, റെയിസ്റ്റർ തുടങ്ങിയ യൂട്യൂബർമാരുടെ വീടുകളിലും ഓഫീസുകളിലുമാണ് പരിശോധന നടന്നതെന്നാണ് വിവരം.
Discussion about this post